İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 242 Hüküm no: 319 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa vakfına ait olup kiracısı Toga v. Mosi’nin tarafından tamir ettirilen evin keşfi Mahmiye-i İstanbul’da Hobyar mahallesi sâkinlerinden bâ‘isü’l-kitâb Toga v. Mosi nâm Yahudi mahfil-i kazâda takrîr-i merâm edip, merhûm Mustafa Ağa vakfından olup mahalle-i mezbûrede vâki‘ mûmâ-ileyhe intimâ’ ile tahdîd ve tavsîfden müstağnî olan tahtânî menzile ücret-i müeccele ile sâkin iken, harâbe müşrif olup ta‘mîre muhtâc oldukda, vakf-ı mezbûr mütevellîsi olan işbu hâzır bi’l-meclis olan Mustafa Bey b. Yunus kendi malımdan ta‘mîr edip ba‘dehû tedrîciyle ücret-i müeccelesinden mahsûb olmak üzre izin verip, hat ve hâtemini muhtevî temessük vermeğin, ben dahi lâzımü’t-ta‘mîr olan mevâzi‘ini meremmet etmişidim. Hâlâ üzerine adam gönderilip ne mikdâr akçe ile ta‘mîre mütehammil idiği görülüp, ketb ü tahrîr olunmasını taleb ederim dedikde, cânib-i şer‘-i kavîmden Mevlânâ Mahmud Efendi irsâl olunup, hâssa mi‘mârlarından Üstâd Ali Bey ve Üstâd Mustafa Bey ve mütevellî-i mezbûr ve zeyl-i kitâbda mastûrü’l-esâmi olan Müslimîn ile üzerine varıp müşâhede eylediklerinde, fi’l-hakīka menzil-i mezkûrda tûlen ve arzen hesâb-ı şatrancî üzre altmış dört zirâ‘ kârgir ocağı ta‘mîr olunup, her zirâ‘ı kırkar akçeden iki bin beş yüz altmış akçe ve yedi büyük direklerine isnâdiyesiyle bin beş yüz akçe ve on beş kürsü taşına altı yüz akçe ve Rumeli battalı demekle ma‘rûf üç büyük taban direklerine ikişer yüz yirmişer akçeden altı yüz altmış akçe, menzil-i mezkûrûn ta‘mîr olunan mevâzi‘inin cem‘an beş bin üç yüz yirmi akçe ile ta‘mîre tahammülü olduğunu mi‘mârân-ı merkūmân ve ahâlî kabûl ve iz‘ân haber verdiklerini mevlânâ-yı merkūm mahallinde tahrîr edip, ba‘dehû gelip mahfil-i kazâda inhâ ve takrîr etmeğin, mâ hüve’l-vâki‘ gıbbe’t-taleb ketb ü tahrîr olunup yed-i tâlibe def‘ olundu. Tahrîren fi evâsıtı Cemâziyelevvel sene 1027. Şuhûd[ü’l-hâl]: Mehmed b. Ferhad, Mehmed b. Abdullah, Süleyman Bey b. Abdullah el-cündî, İsmail b. Abdullah, Sinan Halîfe el-imâm, Ahmed Çelebi el-müezzin ve gayruhüm.