İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 242 Hüküm no: 320 Orijinal metin no: [35b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Çelebi b. Hasan’ın, Mehmed b. Abdullah’taki alacağının varislerine ödenmesi Anadolu Kazaskeri hizmetinde olan muhzırlardan olup, mahmiye-i İstanbul’da Ali Bey mahallesinde vefât eden Yahya Çelebi b. Hasan’ın sulbî oğlu Mustafa Çelebi nâm sagīrin vasî-yi şer‘îsi ve müteveffâ-yı mezbûrun vâlidesi ve vârisesi Güldalı bt. Evhad’ın husûs-ı âtiye vekîl-i şer‘îsi hâmilü’l-kitâb Nuh b. Hasan mahfil-i kazâda, Mehmed b. Abdullah nâm kimesne muvâcehesinde takrîr-i da‘vâ edip, müteveffâ-yı mezbûr hâl-i hayâtında merkūm Mehmed’e iki yüz kâmil guruş karz verip, ol dahi istikrâz ve kabz edip, hâlâ mersûm Yahya Çelebi vefât etmekle, verâseti vasîsi olduğum sagīr-i mezbûr ile müvekkilem merkūme Güldalı’ya ve zevce-i metrûkesi Ceyhun Hâtun’a münhasıra olmağın, zikr olunan iki yüz guruşdan zevcesi merkūme Ceyhun’un sümün hissesine isâbet edenden mâ‘adâsını vesâyet ve vekâletim hasebiyle merkūm Mehmed’den taleb ederim dedikde, akībü’s-suâl [ve] akībü’l-inkâr ve’l-istişhâd, udûl-i Müslimînden vilâyet-i Anadolu’da Karışturin [Karışdıran] kadısı Mevlânâ Muhyiddin b. ( ) Todurga kazâsından munfasıl Zülfikar Efendi b. Ahmed ve Veli Efendi b. Vildan el-müsta‘id li ecli’ş-şehâde meclis-i şer‘a hâzırûn olup, istişhâd olunduklarında, fi’l-hakīka merkūm Mehmed hâl-i hayâtında mersûm Yahya Çelebi’den iki yüz guruş istikrâz ve kabz ettiğine ikrâr eyledi. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye edip, gıbbe ri‘âyet-i mâ lâbüdde min şerâ’iti’l-kabûl şehâdetleri hayyiz-i kabûlde vâki‘ oldukdan sonra, zikr olunan iki yüz guruşdan zevcesi merkūme Ceyhun’a isâbet eden sümün hissesinden mâ‘adâsını vasî ve vekîl olan müdde‘î-i merkūma teslîm etmesine mezbûr Mehmed’e tenbîh olundu. Mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min Cemâziyelevvel li sene seb‘a ve ışrîn ve elf. Şuhûdü’l-hâl: Mehmed b. Murad, Osman b. Abdullah, Mustafa b. Çukadâr, İbrahim Çelebi b. Abdurrahman, Hidâyet Efendi el-kadı ve gayruhüm.