İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 244 Hüküm no: 322 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ruhşan bt. Abdullah’ın, ölen kocasının varislerinden mehrini tahsil etmesi Vilâyet-i Anadolu’da Yalakābâd kazâsına tâbi‘ Çaliçe nâm karye ahâlîsinden iken vefât eden Murtaza b. Ömer’in zevce-i metrûkesi olan Ruhşan bt. Abdullah nâm hâtun mahfil-i kazâda, müteveffâ-yı mezbûrun tenfîz-i vesâyâsına ve düyûnunu îfâya ve sâir umûruna vasî-yi muhtârı olan râfi‘ü’l-kitâb Şecâaddin b. Mustafa mahzarında ikrâr-ı tâm ve takrîr-i kelâm edip, müteveffâ-yı mezbûr Murtaza’da bin yedi yüz akçe mehr-i mu‘accelim olup vefât ettikde, mezbûr Şecâaddin vesâyeti hasebiyle muhallefâtına vaz‘-ı yed etmeğin, meblağ-ı merkūmu muhallefâtından taleb eyledikde, mezbûr inkâr etmekle, muvâcehesinde şuhûd-ı udûlle isbât etmişidim. El-hâletü hâzihî meblağ-ı merkūmu vasî-yi mezbûr yedinden müteveffâ-yı mersûm muhallefâtından alıp kabz etdim dedikde, mezbûre Ruhşan ikrâr-ı meşrûhunda vasî-yi mezbûr dahi vicâhen tasdîk etmeğin, mâ vaka‘a gıbbe’t-taleb ketb ü tahrîr olundu. Tahrîren fi evâhiri şehri Rebî‘ilâhir li sene 1027. Şuhûd[ü’l-hâl]: Mustafa b. Abdullah, Mustafa b. İbrahim, Mehmed b. Ali, Musa b. Mehmed, Mehmed b. Ahmed, Hasan b. Ali, Ahmed b. Ömer.