İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 243 Hüküm no: 321 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mada v. İrazo’nun koyun satışından olan borcunu İstoyo’ya ödediği Vilâyet-i Rumeli’nde medîne-i Filibe müzâfâtından Otluk nâm karyede sâkin İstoyo v. Yoni nâm zimmî meclis-i şer‘-i şerîfde, hâmil-i hâze’l-kitâb Mada v. İrazo nâm zimmî mahzarında takrîr-i da‘vâ edip, merkūm Mada zimmetinde beynimizde adedi ve kıymeti ma‘lûm müşterâ ve makbûz koyun bahâsından on üç bin iki yüz elli akçe hakkım vardır taleb ederim dedikde, gıbbe’s-suâl merkūm Mada cevâbında, fi’l-hakīka müdde‘î-i merkūm İstoyo’ya koyun bahâsından on üç bin iki yüz elli akçe deynim olup, lâkin bundan akdem meblağ-ı mersûmu bi’t-tamâm merkūm İstoyo’ya edâ eyledim deyicek, merkūm İstoyo meblağ-ı merkūmu ahz eylediğini inkâr edicek, mersûm Mada’dan takrîrine muvâfık beyyine taleb olundukda, Hüseyin b. Ahmed el-attâr ve Kaya v. Aslan nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ merkūm Mada meblağ-ı merkūm on üç bin iki yüz elli akçeyi bizim huzûrumuzda müdde‘î-i merkūm İstoyo’ya teslîm eyledi. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde, ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a oldukdan sonra, merkūm İstoyo mu‘ârazadan men‘ olunup, mâ vaka‘a bi’t-taleb ketb olundu. Tahrîren fi’l-yevmi’s-sâdis aşer min Cemâziyelevvel sene seb‘a ve ışrîn ve elf. Şuhûd[ü’l-hâl]: Mustafa Ağa Haraccı, Sinan b. Abdullah, Mustafa b. Kasım acemioğlanı, Abdurrahman Çavuş el-mübâşir, Ebûbekir b. Osman, Karagöz Ağa, Ali Çelebi b. Müstakīm, Solak Bey Çorbacı, Mehmed Ağa er-râcil.