İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 245 Hüküm no: 324 Orijinal metin no: [36a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Yorgi’nin Ayasofya-i kebir vakfına ait arazinin tasarruf hakkını Mecid Efendi’ye devrettiği Zimmî tâ’ifesinden olan Andriye v. Yorgi meclis-i şer‘-i şerîf-i şâmihü’l-imâdda, işbu sâhibü’l-kitâb hâlâ Reîsülküttâb olan umdetü’l-emâcid ve’l-ekâbir müstecmi‘u cemî‘u’l-me‘âlî ve’l-mefâhir kıdvetü erbâbi’t-tahrîr ve’l-kalem zübdetü erbâbi’t-tastîr ve’r-rakam Mecid Efendi, neclü’l-merkūm mahzarında ikrâr ve takrîr-i kelâm edip, Dârü’s-saltanati’s-seniyye Kostantıniyye el-mahmiyye hısn-ı ebvâbından Cebe Ali kapısı hâricinde vâki‘ Ayasofya-yı kebîr vakfından olup, iki tarafı vakf-ı mezbûr ile ve bir tarafı tarîk-i âm ile mahdûd olup, her sene cihet-i vakfa mukāta‘a ile ilâ hîn-i sudûri hâze’t-tefvîz taht-ı tasarrufumda olan arz-ı hâliyenin hakk-ı tasarrufunu mütevellîsi ma‘rifeti ile mûmâ-ileyh Mecid Efendi’ye tefvîz edip, ol dahi tefevvüz ve kabûl ettikden sonra mukābele-i tefvîzde müşârun-ileyh Mecid Efendi yedinden altı bin nakd-i râyic fi’l-vakt akçeyi bi’t-tamâm ve’l-kemâl alıp kabz etdim dedikde, mukırr-ı merkūmun ikrârın mütefevviz-i mûmâ-ileyh dahi bi’l-muvâcehe tasdîk edicek, mâ vaka‘a isre’t-taleb ketb olundu. Hurrire fi’l-yevmi’t-tâsi‘ aşer min Cemâziyelevvel li sene seb‘a ve ışrîn ve elf. Şuhûd[ü’l-hâl]: Fahrü’l-cüyûş Kasım Çavuş, Hüseyin Efendi, Müslim Efendi el-kâtib.