.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 246
Hüküm no: 327
Orijinal metin no: [36b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Kaya’nın varislerinden Hürmüz’ün diğer varis Hırsali’den istediği kırmızı kaftanın Hırsali’nin mülkü olduğu

Mahmiye-i İstanbul’da Edirnekapısı dâhili kurbunda bundan akdem hâlik olan Kaya v. ( ) nâm Ermeninin vârisi sulbî oğlu Hürmüz ve zevcesi bâ‘isetü hâze’l-kitâb Hırsali bt. Serkiz nâm Ermeniye münhasıra olduğu mütehakkik oldukdan sonra, mezbûr Hürmüz merkūme Hırsali mahzarında kelâm edip, sâbıkan babam mezbûr Kaya hâl-i hayâtında bana iki bin akçe kıymetli bir kırmızı kemhâ kaftan alıverdi idi. Mezbûre Hırsali hâlâ zikr olunan kaftana vaz‘-ı yed etmişdir, suâl olunup alıverilmek taleb ederim dedikde, gıbbe’s-suâl mezbûre Hırsali cevâbında, zikr olunan kaftan için, bana zevcim mezbûr Kaya hâl-i hayâtında giymek için alıverip ile’l-ân mülküm olmak üzre vaz‘-ı yed etmişimdir deyip, mezbûr Hürmüz’den sıdk-ı kelâmına beyyine taleb olunup, aczi zuhûr etmekle, zikr olunan kaftan zevcine sâlih olmakla, bu makūlelerde kavl sak olup yemîni ile musaddak olmakla, mezbûre Hırsali’ye yemîn teveccüh edip, ol dahi zikr olunan kaftan için, mülk olup zevci kendüye verdiğine yemîn billâhi’llezî enzele’l-incîle alâ Îsâ aleyhi’s-selâm edip, mezbûr Hürmüz’ün mu‘ârazadan men‘i birle, mâ vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min Cemâziyelevvel sene seb‘a ve ışrîn ve elf.


Şuhûdü’l-hâl: Mehmed Bey b. Hasan en-nüvvâbü’s-sultânî, İbrahim Beşe b. Abdullah er-râcil, Ali b. Abdullah, Murad b. Abdullah, Yusuf b. Abdullah.