İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 246 Hüküm no: 328 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çadırcı Hayreddin vakfının tamir ettirilen odalarının keşfi Mahmiye-i İstanbul’da İbrahim Paşa mahallesinde vâki‘ merhûm Çadırcı Hayreddin Vakfı’nın mütevellîsi Veli Bey b. Bâli tarafından kāimmakām olan, işbu râfi‘ü’l-kitâb Mustafa b. İsmail meclis-i şer‘-i celîde takrîr-i kelâm edip, vakf-ı mezbûrdan olup, mahalle-i merkūmede vâki‘ altı bâb odaları savb-ı şer‘den me’zûn olmakla ba‘zı mevâzi‘i ta‘mîr etmişdim. Hâlâ üzerine âdem gönderilip ta‘mîr olunan mevâzi‘ görülüp, mertebe-i tahammülü tahmîn olunup, ketb ü tahrîr olunmasın taleb ederim dedikde, cânib-i şer‘-i kavîmden Mevlânâ İsmail Efendi ve hâssa mi‘mârlarından Üstâd Ali Bey b. Abdullah irsâl olunup, zeyl-i kitâbda mastûrü’l-esâmi olan bî-garaz Müslimîn ile üzerlerine varıp müşâhede eylediklerinde, zikr olunan odaların sakfı kiremidleri nakz ile mahlûtan ta‘mîr olunmuş bulunup, mesâha olundukda tûlen ve arzen hesâb-ı şatrancî üzre üç yüz on iki zirâ‘ olup, her zirâ‘ı yirmi beş akçeden yüz bin sekiz yüz akçe olup ve tahta perdeleri tûlen ve arzen bi hesâb-ı mezbûr yüz otuz zirâ‘ olup, her zirâ‘ı altışar akçeden sekiz yüz yirmi akçe olup, cem‘an zikr olunan odaların ta‘mîr olunan mevâzi‘i sekiz bin beş yüz akçe ile ta‘mîre tahammül olduğunu mi‘mâr-ı mezbûr ve sâir ahâlî-i vukūf haber verdiklerin, mevlânâ-yı mezbûr mahallinde tahrîr ve mahfil-i kazâda ihbâr etmeğin, mâ hüve’l-vâki‘ gıbbe’t-taleb ketb olundu. Tahrîren fî evâsıtı şehri Cemâziyelevvel sene seb‘a ve ışrîn ve elf. Şuhûd[ü’l-hâl]: Mustafa Beşe çukadâr, el-Hâc Bekir Halîfe el-imâm, Mahmud Çelebi, Ahmed Halîfe el-müezzin, Musa b. Durak, Ali Bey el-cündî.