İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 252 Hüküm no: 339 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Çavuş b. Bâli’nin, eşi Rahime bt. Abdullah’ın malları ve ona olan borçlarıyla ilgili ikrârı Mahmiye-i Kostantıniyye mahallâtından Debbâğzâde mahallesi sâkinelerinden, işbu râfi‘atü’l-kitâb Rahime Hâtun bt. Abdullah meclis-i şer‘-i şerîf-i şâmihu’l-imâdda takrîr-i kelâm ve ta‘bîr ani’l-merâm edip, husûs-ı âti’z-zikrin kıbel-i şer‘-i şerîfden üzerine varılıp mahallinde tahrîr olunması matlûbumdur dedikde, savb-ı şer‘-i şerîfden Mevlânâ Süleyman Efendi zeyl-i kitâbda mastûrü’l-esâmi olan Müslimîn ile irsâl olunup, üzerine varıp akd-i meclis olundukda, mahalle-i mezbûre sâkin[e]lerinden mezbûre Rahime Hâtun’un zevci olup hâlâ marîz ve esîr-i firâş olan Abdi Çavuş b. Bâli meclis-i şer‘-i şerîfde, zevcesi merkūme Rahime Hâtun muvâcehesinde ikrâr ve i‘tirâf edip, mezbûre Rahime Hâtun’a hâlâ zimmetimde karz-ı şer‘îden yirmi bin akçe mehr-i müeccelden dahi yirmi bin akçe vâcibü’l-edâ deynim vardır dedikden sonra, mahalle-i mezbûrede vâki‘ üç fevkānî ve bir tahtânî evi ve bir ahırı ve bir samanlığı müştemil olup, bir tarafı Nakkaş Mehmed Çelebi mülkü ile ve bir tarafı Hümâ Hâtun Vakfı ile ve bir tarafı İbrahim Çelebi mülkü ile ve bir tarafı dahi tarîk-i âm ile mahdûd olan menzil, mezbûre Rahime Hâtun’un mülk-i müşterâsı olup, kendi mâlı ile binâ eylemişdir, mezbûrenin mülk-i mahzıdır ve menzil-i mezkûrede olan esâs-ı beyt ve evânî ve nühâs ve’l-hâsıl, ism-i mâl ıtlâk olunup menzil-i mezkûrûn içinde hâlâ mevcûd olan mezbûrenin mülk-i mahzıdır. bi vechin mine’l-vücûh benim alâkam yokdur dedikde, mukırr-ı mezbûrun ikrâr-ı meşrûhun mezbûre Rahime dahi bi’l-muvâcehe tasdîk ettikde, mevlânâ-yı mûmâ-ileyh mahallinde tahrîr edip, meclis-i şer‘-i şerîfde alâ vukū‘ihi inhâ etmeğin, mâ vaka‘a ketb olundu. Tahrîren fi’l-yevmi’t-tâsi‘ aşer min Cemâziyelevvel li sene seb‘a ve ışrîn ve elf. Şuhûd[ü’l-hâl]: Fahrü’l-müderrisîni’l-kirâm Mehmed Efendi b. Hüsam, Şeyh Mehmed b. İbrahim el-Medenî, Muzaffer Ağa b. Abdülmennân el-Bevvâbü’s-sultânî, Kasım [b.] Abdullah, Mehmed b. Evliyâ, Ömer b. Mustafa, Bosnevî Mehmed Ağa.