İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 253 Hüküm no: 340 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsu bt. Beşe Hâtun vakfı evinin, vakıf evlatlarından Meryem ve Sâliha Hâtunlar arasında taksim edildiği Mahmiye-i İstanbul’da Manisalı Çelebi mahallesi sâkinelerinden Sâliha Hâtun bt. Mehmed mahfil-i kazâda, Meryem Hâtun bt. Süleyman mahzarında takrîr-i kelâm edip, mahalle-i mezbûrede vâki‘ iki tarafdan mahalle-i mezbûre imâm ve müezzinine mevkūf menzil ve Sinan Subaşı mülkü, iki tarafdan tarîk-i âm ile mahdûd ve altı bâb süflâ evleri ve su kuyusunu ve muhavvatayı müştemil olan menzili, mâlikesi ve ceddemiz merhûme ve mağfûrun-lehâ Âsu bt. Beşe Hâtun vakf edip, süknâsını evvelâ kendine ba‘dehâ sadriye kızları Safiye ve Hümâyûn nâm hâtunlara, ba‘dehümâ evlâdlarına ve evlâd-ı evlâdlarına şart etmişidi. Hâlâ evlâd-ı vâkıflar olup, derecede beraber olmakla menzil-i mezkûrûn süknâsı bana ve mezbûre Meryem’e intikāl etmeğin, cânib-i şer‘-i mübîn üzerine adam gönderilip her birimizin hissesi sebt ve tahrîr olunmasın taleb ederim dedikde, kıbel-i şer‘den Mevlânâ Mahmud irsâl olunup, Hâssa mi‘mârlardan Üstâd Ali Bey b. Abdullah ve zeyl-i kitâbda isimleri mastûr olan Müslimîn ile üzerine varıp, mezbûre Meryem muvâcehesinde mesâha eylediklerinde, menzil-i mezkûrûn tûlen ve arzan hesâb-ı şatrancî üzre bin üç yüz seksen zirâ‘ arsası olup, zikr olunan imâm ve müezzine mevkūf menzile muttasıl ve üç bâb süflâ evleri müştemil ve altı yüz doksan zirâ‘ olan tarafı su kuyusu, beynlerinde müşterek olmak üzre mezbûre Sâliha’nın hissesine ta‘yîn ve nısf-ı âharı vech-i merkūm üzre mezbûre Meryem’in hissesine ta‘yîn ve tahsîs olunup, her biri rızâları ile hisselerin kabz ve tesellüm eylediklerin mevlânâ-yı merkūm mahallinde tahrîr edip, ba‘dehû gelip mahfil-i kazâda inhâ ve takrîr etmeğin, mâ vaka‘a gıbbe’t-taleb ketb ü tahrîr olundu. Tahrîren fi’l-yevmi’r-râbi‘ ve’l-ışrîn min Cemâziyelevvel li sene 1027. Şuhûd[ü’l-hâl]: Hüsameddin Efendi b. Abdülkadir el-imâm, Ahmed b. Hasan, Mahmud b. Hasan, Mehmed b. Himmet, Diğer Himmet b. Himmet, Rüstem b. Abdullah, Mehmed Beşe b. Abdullah er-râcil, Ahmed Beşe b. Abdullah er-râcil ve gayruhüm.