İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 258 Hüküm no: 347 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Bekir b. Abdülmennân’ın, Mehmed Ağa b. Mehmed’den aldığı ödünç para karşılığında çiftliğini rehin verdiği Vilâyet-i Rumeli’nde İnebahtı alaybeyi olan kıdvetü’l-a‘yân Osman Bekir b. Abdülmennân meclis-i şer‘de, bâ‘isü’l-kitâb mefharü’l-emâcid ve’l-ekârim bi’l-fi‘il Rumeli kethüdâsı olan Mehmed Ağa b. Mehmed mahzarında ikrâr ve takrîr-i kelâm edip, merkūm Mehmed Ağa’ya deyn-i şer‘îden yüz elli bin akçe deynim olup, meblağ-ı mekūmun hâlâ on bin akçesini merkūma edâ ve teslîm edip ve meblağ-ı bâkī yüz kırk bin akçe mukābelesinde Yenişehir kazâsına tâbi‘ Yusuflu nâm karyede vâki‘ olup, bir tarafı el-Hâc Muharrem mülküne ve bir tarafı Yazıcı Mehmed demekle ma‘rûf kimesne mülküne ve bir tarafı Pîrî Şah b. Hüseyin mülküne ve taraf-ı râbi‘i tarîk-i âmma müntehî olup, bir büyük ahırı ve büyût-ı müte‘addideyi müştemil olan çiftlik demekle ma‘rûf mülk menzilimi, merkūm Mehmed Ağa’ya bundan akdem rehin vaz‘ edip, ba‘de’t-tahliyye teslîm eyledim, ol dahi irtihân ve kabûl ve kabz ettikden sonra meblağ-ı merkūm yüz kırk bin akçenin yetmiş bin akçesini merkūm Mehmed Ağa’nın vekîli ve kayınatası olup hâlâ Alasonya’da Yeniçeriler serdârı olan Osman Bey nâm kimesneye târih-i kitâbdan altı ay tamamına değin edâya müte‘ahhid olup, bâkī kalan yetmiş bin akçeyi dahi târih-i kitâb şehri gurresinde bir sene tamamına müeccel olup, ba‘de tamâmi’s-sene merkūm Mehmed Ağa’ya teslîm edeyim dedikde, mâ vaka‘a kayd şüd. Tahrîren fi’l-yevmi’s-sâdis min Cemâziyelevvel li sene seb‘a ve ışrîn ve elf. Şuhûd[ü’l-hâl]: Umdetü’l-eşrâf ve’l-a‘yân Mehmed Ağa Kethüdâ-yı bevvâbân, Zahrü’l-a‘yân Ömer Ağa kethüdâ-yı hazret-i Davud Paşa, Fahrü’l-eşbâh Hüseyin el-cündî, Fahrü’l-akrân Yakub, Yahya Bey er-râcil, Hüseyin Bey er-râcil ve gayruhüm.