İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 257 Hüküm no: 346 Orijinal metin no: [38b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülazîz b. Ömer’in, Süleyman b. Yahya’ya olan borcunu havale usulüyle ödediği Demircilerden Süleyman b. Yahya mahfil-i kazâda hâmilü’l-kitâb Abdülazîz b. Ömer el-Mevlâ mahzarında üzerine da‘vâ edip, bundan akdem beynimizde vasf ve kadri ilm-i şer‘î ile ma‘lûm bin beş yüz akçelik eski enseri, mezbûr Abdülazîz’e bey‘ ve teslîm edip, ol dahi tesellüm etmişdi. Hâlâ semenin taleb ederim dedikde, gıbbe’s-suâl mezbûr Abdülaziz cevâbında, fi’l-vâki‘ mezbûr Süleyman’dan vech-i merkūm üzre bin beş yüz akçelik enseri iştirâ ve teslîm almış idim. Lâkin semen-i merkūmu mezbûr Süleyman Mesud b. ( ) nâm kimesneye üçü mahall-i vâhidde hâzır iken hâvâle-i şer‘iyye ile havâle edip, ol dahi havâle-i merkūmeyi kabûl etmeğin, mezbûr Süleyman’ın semen hakkı kalmamışdır deyicek gıbbe’l-inkâr ve akībü’l-istişhâd, udûl-i Müslimînden Hüseyin b. Hamid ve Salim b. Süleyman ve Piyâle b. Abdullah nâm kimesneler mahfil-i kazâya li ecli’ş-şehâde hâzırûn olup, fi’l-vâki‘ mezbûr Süleyman mezbûr Abdülazîz zimmetinde enser bahâsından olan bin beş yüz akçe hakkını mezbûr Mesud’a üçü meclis-i vâhidde hâzırlar iken bizim her birimize havâle-i şer‘iyye ile havâle edip, ol dahi havâle-yi merkūmeyi kabûl etti. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, gıbbe’t-ta‘dîl ve’t-tezkiye şehâdetleri makbûle olup, mûcebiyle ile mezbûr Süleyman mütâlebeden men‘ olundu. Tahrîren fî 24 Cemâziyelevvel li sene 1027. Şuhûd[ü’l-hâl]: Osman b. Abdullah Hasan b. Memi, Ahmed b. Hüseyin, Yusuf b. Bayram, Eyüb b. Hamid.