İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 259 Hüküm no: 350 Orijinal metin no: [39a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi Vakfına ait evi tamir etmesi hususunda Nâzenin Hâtun bt. Abdullah’a izin verildiği Mahmiye-i İstanbul’da Câmeşûy İbrahim Çelebi nâm sâhibü’l-hayrın atîkalarından, râfi‘atü hâze’l-kitâb Nâzenin Hâtun bt. Abdullah meclis-i şer‘-i şerîfde takrîr-i kelâm edip, seyyidim mezbûr İbrahim Çelebi mahmiye-i mersûmda Uzun Şucâ‘ mahallesinde vâki‘, bir tarafdan Ahmed Ağa mülkü ve bir tarafdan Çıtacı Ali Bey mülkü ve bir tarafdan tarîk-i hâs ve bir tarafdan tarîk-i âm ile mahdûd olup, fevkānî ve tahtânî dört bâb büyûtu ve bir ahır ve bi’r-i mâ ve kenîfi müştemil olan menzilini, hâl-i sıhhatinde vakf edip, süknâsını utekāsına ve evlâd-ı utekāsına, ba‘de’l-inkırâz ulemâdan bir kimesneye şart edip, lâkin menzil-i mezbûr mürûr-ı eyyâm ile harâbe müşrif olup, ihmâl olduğu takdîrce bi’l-külliye münhedim olmak mukarrerdir ve mezbûr İbrahim Çelebi’nin utekāsından Kâmile bt. Abdullah ile fukarâdan gayri kimesne yokdur, menzil-i mezbûru meremmet [ve] ta‘mîr ettirmek murâd ettiğimde, mezbûre Kâmile bana mâni‘ olur, kıbel-i şer‘den ehl-i hibre ile üzerine varılıp, ne mikdâr akçe ile ta‘mîr olunmak mümkündür, ba‘de’t-tahmîn ketb ü tahrîr olunup izn-i şer‘î verilmek taleb ederim dedikde, savb-ı şer‘den Mevlânâ İsmail Efendi b. Ömer ve hâssa mi‘mârlarından Üstâd Mustafa Bey b. Hüsameddin irsâl olunup, ol dahi zeyl-i kitâbda mastûrü’l-esâmi olan Müslimîn ile mahall-i mezbûra varıp nazar ettiklerinde, menzil-i mezbûrun bi hesâb-ı şatrancî iki yüz zirâ‘ sakfına beher zirâ‘ yirmişer akçeden dört bin akçe ve ta‘mîrât ve meremmetine sekiz yüz akçe ve ahırına ve direklerine üç bin akçe ve fevkānî tahta-pûşa beş yüz akçe ve kapı üzerinde vâki‘ küçük odanın pencerelerine ve taş duvarlarına beş yüz akçe, cem‘an sekiz bin sekiz yüz akçe ile ancak ta‘mîr olur deyû mevlânâ-yı mezbûr [ve]sâir ehl-i vukūf müslimîn ittifâkıyla haber verdiklerinde, vâki‘ hâli mevlânâ-yı mezbûr mahallinde tahrîr ve mahfil-i kazâda ihbâr ve takrîr etmeğin, mezbûre Nâzenin Hâtun’a menzil-i mezkûru minvâl-i muharrer üzre binâya izin verilip, mâ hüve’l-vâki‘ ketb olundu. Tahrîren fi’l-yevmi’s-sâbi‘ ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Ahmed Efendi b. Hüseyin el-müderris, Mehmed b. Abdullah er-râcil, Kemal Bey b. Hasan, Hüseyin Bey b. Veli ve gayruhüm.