İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 260 Hüküm no: 351 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirnekapı’daki koyun ve mukâtaasının eskiden beri Yahya Çavuş, Danyal ve Yasef üzerinde olduğu Mahmiye-i İstanbul’da Edirnekapısı’nda vâki‘ bâc-ı pây-ı ağnâm ve elvâh-ı fıçı ve varil ve tevâbi‘i mukāta‘asına ber vech-i iştirâk emîn olan işbu râfi‘ü’l-kitâb Yahya Çavuş b. Mehmed ve Danyal v. Yahudi ve Yasef v. Yahudi meclis-i şer‘-i şerîf-i Muhammedî ve mahfil-i dîn-i münîf-i Ahmedî’de, mürde emînleri olan İlya ve Avraham ve Yako ve Yohanna ve Alus nâm Yahudiler mahzarında üzerlerine takrîr-i da‘vâ edip, mahmiye-i mezbûrede olan koyunun ve sığırın ayak bâcı kadîmden bizim mukāta‘amıza tâbi‘ iken, mezbûrlar fuzûlen müdâhele ederler, suâl olunup men‘ olunmaları matlûbumuzdur dediklerinde, gıbbe’s-suâl mezbûrlar müdâhele ettiklerin ikrâr edip, lâkin biz tasarruf ede gelmişizdir deyip, minvâl-i meşrûh üzre mezbûrlardan berât taleb olundukda, berâtları olmadığını i‘tirâf edip, müdde‘iyyûn-ı mezbûrûnun berâtlarında musarrah ve mu‘ayyen olmağın, ta‘arruzdan men‘ birle, mâ vaka‘a ketb olundu. Tahrîren fi’l-yevmi’s-sâdis ve’l-ışrîn min Cemâziyelevvel sene seb‘a ve ışrîn ve elf. Şuhûd[ü’l-hâl]: Hasan Çelebi b. Ahmed, Âbidin Beşe b. Abdullah, Hamza b. ( ) Du‘âcı, Mustafa, Murad b. Mehmed.