İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 269 Hüküm no: 367 Orijinal metin no: [41a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kenan Ağa Vakfı’na ait evin Evliyâ Mehmed Efendi b. Cafer’e kiraya verildiği Merhûm Kenan Ağa vakfına berât-ı pâdişâhî ile mütevellî olan Hüseyin Bey b. Mahmud meclis-i şer‘de, sâlik-i mesâlikü’l-hidâye ve’t-ta‘yîn vâkıf-ı muvâfıku’r-rüşd ve’t-temkîn âlim-i ma‘âlimü’t-tarîka vâsıl-ı âlemü’l-hakīka Evliyâ Mehmed Efendi b. Cafer tarafından tasdîk-i âti’z-zikre vekîl olup, hasm-ı câhid mahzarında Mehmed b. Ahmed ve Osman b. Mehmed şehâdetleriyle vekâleti sâbite olan Mustafa Efendi b. Mustafa muvâcehesinde ikrâr ve takrîr-i kelâm edip, vakf-ı mezbûrdan olup mahmiye-i İstanbul’da Ayasofya-i kebîr mahallesinde vâki‘ bir tarafı Ayşe Hâtun bt. Fîrûz Ağa vakfına ve bir tarafı Şehzâde Hâtun bt. Yunus vakfına ve tarafeyni tarîk-i âmma müntehî olup, yedi bâb dükkânı ve üzerinde dört bâb odaları ve zikr olunan odaların üzerinde biri birine mukābil iki oda ve bir sofayı ve ondan mâ‘adâ iki bâb büyük ve iki bâb küçük fevkānî odaları ve bir sofa ve bir dehliz ve bir matbah ve bir kiler ve iki kenîf ve bir ahır ve bir fevkānî köşkü müştemil olan menzili, yevmî onar akçe icâre-i müeccele ve altmış bin akçe icâre-i mu‘accele ile merkūm Evliyâ Mehmed Efendi’ye tevliyyetim hasebiyle icâr ve ba‘de’t-tahliyye teslîm eyledim, ol dahi târih-i kitâbdan istîcâr ve kabûl ettikden sonra icâre-i mu‘accele olan meblağ-ı merkūm altmış bin akçeyi vakf için yedinden ahz u kabz edip ve menzil-i mezbûrun ta‘mîre muhtâc olan mevâzi‘ini kendi mâlıyla [ta‘mîr] edip, harc eylediğin meblağ icâre-i mu‘acceleye mahsûb olmak üzre merkūm Mehmed Efendi’ye izin verdim dedikde, mütevellî-i merkūmun vech-i mersûm üzre cârî olan kelâmını vekîl-i merkūm vicâhen tasdîk edicek, mâ vaka‘a kayd şüd. Tahrîren fi’l-yevmi’s-sâmin ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Fahrü’s-sulehâ Mehmed Efendi b. Ahmed, Osman Efendi b. Mehmed el-imâm, Mustafa Efendi b. ( ) el-imâm, Fahrü’l-a‘yân Ali Ağa el-müteferrika, el-Hâc İsmail el-Bevvâb.