İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 269 Hüküm no: 368 Orijinal metin no: [41a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Iskarani’nin, Mihal v. Niko’dan ödünçten alacaklı olduğu Zimmî tâ’ifesinden Apostol v. Iskarani meclis-i şer‘de Mihal v. Niko muvâcehesinde üzerine da‘vâ edip, merkūm Mihal zimmetinde karz-ı şer‘îden beş bin akçe ve beynimizde zirâ‘ ve levni ma‘lûm çuka bahâsından sekiz yüz akçe hakkım vardır taleb ederim dedikde, gıbbe’s-suâl ve akībü’l-inkâr, merkūm Apostol’dan müdde‘âsına mutâbık beyyine taleb olundukda, Dimitri v. Yorgi ve Esteryano v. Yorgi nâm zimmîler meclis-i şer‘a hâzırân olduklarında gıbbe’l-istişhâd, fi’l-vâki‘ müdde‘î-i mersûm Apostol’un mersûm Mihal zimmetinde karz-ı şer‘îden beş bin akçe ve çuka bahâsından sekiz yüz akçe hakkı vardır, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-tezkiye şehâdetleri makbûle oldukdan sonra mûcebiyle hükm olundu. Mâ vaka‘a kayd şüd. Ve fi’t-târihi’l-mezbûr. Şuhûd[ü’l-hâl]: Sinan b. Abdullah, Hızır b. Abdullah, Yusuf b. Halil, Murad b. Mehmed, Mehmed b. Eyüb ve gayruhüm.