İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 271 Hüküm no: 372 Orijinal metin no: [41b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çavuş b. Abdullah’ın Kostantine bt. Yani’deki alacağı davanın anlaştığı Dergâh-ı dâme mahfûfen bi’l-me‘âlî çavuşlarından fahrü’l-âşiyân İbrahim Çavuş b. Abdullah meclis-i şer‘-i şerîfde hâfızu’l-kitâb Kostantine bt. Yani nâm zimmî mahzarında takrîr-i kelâm edip, mezbûrenin zimmetinde cihet-i karzdan on sekiz bin akçe hakkım vardır deyû da‘vâ ettiğimde, merkūme dahi inkâr etmekle beynimizde münâza‘ât-ı kesîre vâkı‘a olmuşidi. El-hâletü hâzihî beynimizde muslihûn-ı Müslimûn tavassut edip, husûs-ı mezbûru an inkâr iki bin akçeye sulh ettiklerinde, ben dahi sulh-ı mersûmu kabûl ve bedel-i sulh olan iki bin akçeyi bi’t-tamâm mezkûrenin yedinden ahz u kabz etdim ve meblağ-ı mesfûra müte‘allik âmme-i de‘âvîden mersûme Kostantine’nin zimmetini ibrâ-i âm ile ibrâ etdim. Ba‘de’l-yevm husûs-ı mezkûra müte‘allik benden da‘vâ ve taleb sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde, mezbûr İbrahim Çavuş ikrâr-ı meşrûhunda zimmîye-i mesfûreyi bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâlis min Cemâziyelâhir li sene seb‘a ve ışrîn ve elf. Şuhûd[ü’l-hâl]: el-Hâc Ali b. Abdullah kethudâ-yı muhzırîn, Mustafa Ağa b. Osman serbölük, Osman Çelebi ve Ömer Çelebi b. Mustafa bölükbaşı, Hasan b. Osman, Halil b. İbrahim, Mehmed b. Ömer, Mehmed b. Ali, Mehmed b. Abdullah, Murad b. Mehmed ve gayruhüm.