İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 272 Hüküm no: 374 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Kaya’nın Mehmed b. Halil’e verdiği ödünç para ile eşyaları geri aldığı Mahmiye-i İstanbul’da Harâccı mahallesinde sâkin Mehmed b. Kaya nâm kimesne Meclis-i şer‘-i Nebevî’de Mehmed b. Halil nâm kimesne mahzarında ikrâr ve takrîr-i kelâm edip, bundan esbak merkūm Mehmed zimmetinde cihet-i karzdan dört yüz akçe hakkım olup ve üç yüz akçe kıymetli bir panbuk kebesi ve üç yüz akçe kıymetli bir kazganımı ve bir gömleğimi merkūm Mehmed b. Halil’e emânet vaz‘ etmişdim. Hâlâ meblağ-ı merkūm dört yüz akçeyi ve emânet vaz‘ ettiğim eşyâ-i mezkûreyi aynı ile merkūmun yedinden ahz u kabz eyledim ve mezbûr Mehmed b. Halil ile târih-i kitâba gelince beynimizde bey‘ ü şirâ ve ahz [u] i‘tâ ve nice vech ile mu‘â[me]lâtımız olmuş idi. Hâlâ birbirimizin zimmetini ibrâ ettik, ba‘de’l-yevm birbirimizden da‘vâ ve nizâ‘ sâdıre olursa lede’l-hükkâmi’l-kirâm mesmû‘a olmasın dedikde, ba‘de’l-musâdaka işbu vesîka gıbbe’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Hamza b. Mustafa [el-]havâle, İshak b. Veli, Ali b. Kasım, Mehmed b. Timur, Mustafa, Hasan Çelebi b. Veli.