İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 273 Hüküm no: 376 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ali b. Mustafa’nın kızı Rahime’ye kalan hissenin vekili tarafından alındığı Bundan akdem vefât eden Ali b. Mustafa’nın verâseti sulbiye sagīre kızı Rahime’ye ve zevcesi Kerime Hâtun bt. Mehmed’e ve li ebeveyn kız karındaşı Şakire’ye münhasıra oldukdan sonra, mezbûre Şakire’nin zevci ve tarafından husûs-ı âti’z-zikre vekîli olup mezbûreyi ma‘rifet-i şer‘iyye ile ârifeyn olan Siyami b. Pir Ahmed ve Abdurrahman Efendi b. Pir Mehmed şehâdetleriyle vekâleti sâbite olan Mustafa b. Emrullah meclis-i şer‘de, sagīre-i merkūmenin kıbel-i şer‘den vasîsi olan fahrü’l-âşiyân Mehmed Çavuş b. Mustafa muvâcehesinde bi’l-vekâle ikrâr ve takrîr-i kelâm edip, müteveffâ-yı merkūmun cümle muhallefât-ı verese-i mezbûre beyninde alâ mâ farazallâh taksîm olundukda, muhallefât-ı mezbûrenin cümlesinden müvekkilem merkūme Şakire’nin hissesine dört bin elli akçe isâbet etmiş idi. El-hâletü hâzihî meblağ-ı mârrü’z-zikri vekâlet-i mahkiyem hasebiyle vasiyy-i mûmâ-ileyh yedinden müvekkileme îsâl için bi’t-tamâm ahz u kabz eyledim dedikde, gıbbe’t-tasdîk mâ vaka‘a kayd şüd. Tahrîren fi’l-yevmi’l-hâmis min Cemâziyelâhir min şuhûri li sene seb‘a ve ışrîn ve elf. Şuhûd[ü’l-hâl]: Çukadâr Mustafa Beşe b. İvaz er-râcil, Sefer b. Mehmed, İbrahim b. el-Hâc Mehmed, Mustafa b. Mustafa ve gayruhüm.