İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 274 Hüküm no: 377 Orijinal metin no: [42a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha ve İbrahim b. Mehmed’in, babalarından kalan dükkânı işgal eden Nasûh Efendi b. Mehmed ile anlaştıkları İbrahim b. Mehmed ve li ebeveyn kız karındaşı Sâliha nâm kimesneler meclis-i şer‘de râfi‘ü’l-kitâb fahrü’l-müderrisîni’l-kirâm Nasûh Efendi b. Mehmed muvâcehesinde her biri ikrâr ve takrîr-i kelâm edip, kazâ-i havâss-ı Kostantıniyye’ye tâbi‘ Silivri nâm kasabada vâki‘ Pîrî Paşa oğlu demekle ma‘rûf Mehmed Çelebi vakfından olan bir tarafı Mehmed b. Abdullah ve bir tarafı Mahmud b. Abdullah mülkleri ve bir tarafı vakf-ı mezbûr ile mahdûd olup, vakf-ı merkūma ayda on beş akçe icâre-i müeccele ve icâre-i mu‘accele ile babamız merkūm Mehmed mutasarrıf olduğu bir bâb haffâf dükkânı ve üzerinde bir odanın hakk-ı tasarrufu ba‘de’l-vefât kānûn üzre bize intikāl etmiş iken, merkūm Nasûh Efendi dükkân-ı merkūmu babanız hâl-i sıhhatinde bana fâriğ olmuşdur deyû tasarrufumuza mâni‘ olup, beynimizde münâza‘ât-ı kesîre vâkı‘a olmuşidi. El-hâletü hâzihî tavassut-ı muslihîn ile beynimizde üç bin üç yüz akçe üzerine inşâ’-i akd-i sulh ettiklerinde, biz dahi sulh-ı mezbûru kabûl ve bedel-i sulh olan meblağ-ı merkūmu mezbûrun yedinden bi’t-tamâm ahz u kabz edip dükkân-ı merkūma müte‘allik olan da‘vâdan mezbûrun zimmetini ibrâ ve ıskāt eyledik. Ba‘de’l-yevm husûs-ı mezbûra müte‘allik bi’z-zât bizden veya vekîllerden da‘vâ sâdır olursa lede’l-hükkâmi’l-kirâm mesmû‘a ve makbûle olmaya dediklerinde, mâ vaka‘a kayd şüd. Tahrîren fi’l-yevmi’r-râbi‘ min Cemâziyelâhir li sene seb‘a ve ışrîn ve elf. Şuhûd[ü’l-hâl]: Mustafa Çavuş b. Abdullah eş-şehîr Şekercibaşı, Receb b. Mustafa, Mustafa Reis b. ( ), Ahmed Efendi b. Mehmed el-müderris ve gayruhüm.