İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 275 Hüküm no: 379 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halife b. Kemaleddin’in vakfettiği paranın vakıf olarak devam etmesine karar verildiği İşbu kitâb-ı sıhhat-nisâbın tahrîrine bâ‘is oldur ki, vilâyet-i Anadolu’da Burdur kazâsına tâbi‘ Lengümi nâm karye sâkinlerinden Mehmed Halife b. Kemaleddin meclis-i şer‘-i şerîfde, vakf-ı âtîye li ecli’t-tescîl mütevellî nasb ettiği Ahmed Halife b. Receb mahzarında ikrâr ve takrîr-i kelâm edip, kendi mâlımdan üç bin akçe hasbeten lillâhi te‘âlâ vakf ve habs ve mütevellî-i mezbûra teslîm eyledim, ol-dahi tesellüm eyledikden sonra şöyle şart eyledim ki, mâdemki hayâtda olam meblağ-ı mezbûru vakfiyet üzre mutasarrıf olam ve ba‘de vefâtî meblağ-ı mezbûr mütevellîsi yediyle yılda onu on bir ve rubû‘ akçe hesâbı üzre istirbâh olunup, hâsıl olan üç yüz yetmiş beş akçe ribhin yetmiş beş akçesi vazîfe-i mütevellî olup mâ‘adâsı karye-i mezbûre avârızı için mütevellîsi bir mu‘temed kimesne ile irsâl eyleye deyip, mütevellî-i mezbûr vâkıf-ı merkūmu tasdîk ettikden sonra vâkıf-ı mezbûr mütevellî-i merkūm muvâcehesinde takrîr-i kelâm edip, vakf-ı nukūd inde e’immetine’s-selâse gayr-i sahîh olmağın vakf-ı mezbûrdan rücû‘ etdim deyû meblağ-ı merkūmu taleb ettikde, mütevellî dahi cevâbında İmâm Züfer re’y-i şerîfi üzre sıhhat-i vakf-ı nukūd emr-i mukarrerdir deyû teslîmden imtinâ‘ edip, sadr-ı kitâbda tevkī‘-i vâki‘ olan hâkimden hükm taleb ettikde, ol dahi nazaran li’l-vakf sıhhatine hükm ettikde, vâkıf-ı mezbûr tekrâr bast-ı merâm edip, eğerçi vakf-ı nukūd alâ re’yi’l-imâmi’l-ma‘hûd sahîh ve câ’izdir lâkin lüzûm yokdur, ona binâen taleb ederim deyip mütevellî dahi cevâbında, sıhhat-i vakf ile lüzûm ile lüzûm tev’emândır. Husûsa hükm-i hâkim dahi ola deyip, ba‘de’l-mücâdele hâkim-i müşârun-ileyh dahi bi’l-muvâcehe lüzûmuna dahi hükm edip, min ba‘d vakf-ı mezbûr vakf-ı sahîh ve lâzım olup, nakzı muhâl ve tağyîr ve tebdîli mümteni‘ü’l-ihtimâl oldu. Tahrîren fi’l-yevmi’s-selâse min Cemâziyelevvel li sene seb‘a ve ışrîn ve elf. Şuhûd[ü’l-hâl]: Bâli Efendi b. Ahmed, es-Seyyid Ali b. es-Seyyid Nebi, el-Hâc Resûl b. Mustafa, el-Hâc Veli b. Süleyman ve gayruhüm.