İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 277 Hüküm no: 382 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Perviz Ağa b. Abdülmennân’ın, Sekbânbaşı Yakub Ağa vakfının icâreteynli arsa üzerindeki dükkân binasını vakfettiği Elhamdü li veliyyihî ve’s-salâtü ve’s-selâmü alâ nebiyyihî ve âlihî ve eshâbihi’l-müte’eddibîn bi âdâbihî ve ba‘d bu kitâb-ı hurşît-tâbın tahrîrine bâ‘is ve bâdî ve bu hitâb-ı azîz-nikābın tastîrine hâs ve nâdî oldur ki, Dârü’s-saltanati’l-aliyye Kostantıniyye el-mahmiyye mahallâtından Soğan Ağa mahallesi ahâlîsinden fahrü’l-ekâbir ve’l-a‘yân makbûlü’s-sudûr ve’l-erkân sâhibü’l-hayrât ve râgibü’l-müberrât Perviz Ağa b. Abdülmennân meclis-i şer‘-i kaviyyü’l-bünyân ve mahfil-i dîn-i semiyyi’l-erkânda, vakf-ı ferhunde vasf-ı âti’l-beyâna li ecli’t-tescîl lâ büd-mend olan her dakīk ve celîl için mütevellî nasb ettiği Ahmed Efendi b. Ömer mahzarında bi tav‘ihî ikrâr ve i‘tirâf edip, mahmiye-i mezbûr[da] merhûm ve mağfûrun leh Sultan Bayezid Hân hamamı kurbunda vâki‘ merhûm Sekbânbaşı Yakub Ağa vakfından iki tarafı vakf-ı mezbûr ve bir tarafı tarîk-i âm ile mahdûd olup, üç yüz akçe icâre-i mu‘accele ve yevmî iki akçe ücret-i müeccele ile tasarrufumda olan arsa üzerine olan börekçi dükkânımın mülk-i sarîhim olan binâsını hasbeten lillâhi te‘âlâ vakf ve habs edip şöyle şart eyledim ki, dükkân-ı mezbûr sâir vakıflar gibi yed-i mütevellî ile îcâr olunup hâsıl olan icâreden yevmî iki akçe arsası için Yakub Ağa Vakfı mütevellîsine teslîm oluna ve mezbûr Ahmed Efendi mütevellî olup yevmî bir akçe vazîfeye mutasarrıf ola ve merhûm Kemal Paşa Mescid-i şerîfinde suhuf-ı kübrâdan üç nefer kimesne birer cüz’-i şerîf tilâvet edip yevmî ikişer akçe vazîfe alalar, bir cüz’-i şerîfin sevâbını hazret-i Resûlullah -sallallâhu te‘âlâ aleyhi vesellem- rûh-ı şerîfine ihdâ edeler ve iki cüz’-i şerîfin sevâbını benim rûhuma ihdâ edeler ve cüz’-i şerîfin birini hayâtda oldukça mezbûr Ahmed Efendi tilâvet ede ve birisini dahi Ebûbekir Efendi tilâvet ede ve bir cüz’-i şerîfi dahi merhûm eş-Şeyh Bâli Efendi türbedârı Ali Dede tilâvet ede ve bunların vefâtından sonra Kurşunlu türbe nâm zâviyede olan fukarâ tilâvet edip, minvâl-i muharrer üzre vazîfeye mutasarrıf olalar ve dahi şöyle şart eyledim ki, hayâtda olduğumca merreten ba‘de uhrâ asl-ı vakfa zarar terettüb etmeyecek kadar tebdîl ve tağyîr ve erbâb-ı vezâifi teksîr yedimde ola. Âhar mevzi‘de dükkân-ı mezbûrdan râcih, vakf etmeye sâlih emlâk bulup iştirâ edersem ona tebdîl edem deyip, dükkân-ı mezbûru mütevellî-i mezkûra teslîm etdim, ol dahi tevliyyeti hasebiyle kabz ve tesellüm etti dedikde, vâkıf-ı mezbûru mütevellî-i mersûm cümle kelâmında bi’l-muvâcehe tasdîk edip, emr-i tesâduk tamâm ve tarafeynin kelâmı burada encâm bulıcak, vâkıf-ı ârif kelâmını semt-i âhara sârif olup, vakf-ı mezbûr İmâm-ı a‘zam ve hümâm-ı efham Ebû Hanîfe-i Kûfî hüziye? bi’l-hayr ve Kûfî katında lâzım olmayıp, vâkıf için rücû‘ emr-i meşrû‘ olup ve arz-ı mevkūfe üzerinde olan binâyı cihet-i uhrâya vakf ba‘zı e’imme katında sahîh olmamağın vakf-ı mezbûrdan rücû‘ edip, dükkân-ı mezbûru mülküme red ve tarîk-i vakfı sed etmek isterim dedikde, mütevellî-i mezbûr cevâba mütesaddî olup, eğerçi vakf-ı mezkûr ol imâm-ı mesfûr katında lâzım değil ise e’imme-i sa‘îdin? kibârından nicesi “el-vakfu izâ sahha lezime” buyurmuşlardır ve arz-ı mevkūfe üzerinde olan binâyı cihet-i uhrâya vakf dahi ba‘zı e’imme katında sahîh ve lâzımdır deyû redden imtinâ‘ etmekle, beynlerinde nizâ‘ vâki‘ olup, muvakkı‘-ı sadr-ı kitâb olan hâkim-i hâsım ve’l-ictinâb hazretlerinin huzûr-ı şerîflerinde murâfa‘a olduklarında ol hâkim-i fâzıl-zamîr -sehhelellâhu te‘âlâ aleyhi külle asîrin- cânib-i temhîd-i hayrât-ı evlâ ve taraf-ı teşyîd-i mebânî-i müberrâtı ahrâ görüp, sıhhat ve lüzûmu ihtiyâr eden e’imme-i kibâr ve vakıf arz üzerinde binâ olan ebniye ve müsakkafâtın icrâya vakfiyyetin sıhhatine zâhib olan müctehidîn re’y-i şerîfleri üzre vakf-ı mezbûrun sıhhatine ve lüzûmuna ve şerâ’itinin şer‘ine bi’l-muvâcehe hükm buyurup ve vakf-ı merkūm üslûb-ı mersûm üzre vakf-ı sahîh lâzım olup, min ba‘d nakz u naksına mecâl muhâl oldu. Tahrîren fî evâhiri şehri Cemâziyelevvel li sene seb‘a ve ışrîn ve elf. Şuhûd[ü’l-hâl]: Ebûbekir Efendi, Murad b. Mehmed, Mustafa b. Cafer, Mehmed b. Cafer ve gayruhüm.