İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 277 Hüküm no: 381 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın, Ömer Beşe’den satın aldığı atın elinden alınması üzerine ödediği parayı Ömer Beşe’den istemesi Mahmiye-i İstanbul mahallâtından Evliyâ mahallesi sükkânından Mehmed Bey b. Abdullah nâm cündî meclis-i şer‘de Ömer Beşe b. Abdullah nâm râcil üzerine da‘vâ edip, bundan akdem mezbûr Ömer Beşe boynunun sol tarafında çevgân damgası ve beli altında yara izi ve dudaklarında ve kıç ayakları arasında abrası olan kır bârgiri mülkü olmak zu‘muyla bin beş yüz akçeye bana bey‘ ve teslîm edip, ben dahi iştirâ ve tesellüm ve def‘-i semen edip yedimde iken, Mehmed Bey b. Mustafa nâm cündî müstehık çıkıp hâkim-i muvakkı‘ı’l-kitâb huzûrunda şuhûd ile ısbât edip, hükm-i şer‘le yedimden ahz etmeğin, hâlâ ben de mezbûr Ömer Beşe’ye mürâca‘at edip def‘ eylediğim semeni taleb ederim dedikde, gıbbe’s-suâl mezbûr Ömer Beşe cevâbında, fi’l-hakīka mezbûr Mehmed’e evsâf-ı mezbûre ile mevsûf bir bârgiri vech-i merkūm üzre bey‘ etmişidim. Lâkin yedinden hükm-i şer‘le ahz olunan bârgir idiği ma‘lûmum değildir deyicek, müdde‘î-i mezbûrdan da‘vâsına muvâfıka beyyine taleb olundukda, udûl-i Müslimînden İlyas b. Mehmed ve Kasım Beşe b. Abdullah nâm kimesneler mahfil-i kazâya li ecli’ş-şehâde hâzırân olup istişhâd olunduklarında, fi’l-vâki‘ merkūm Mehmed Bey yedinde merkūm Mehmed Bey b. Mustafa da‘vâ-yı istihkāk edip, ba‘de’l-ısbât hükm-i şer‘le yedinden alınan bârgir bi aynihî müdde‘î-i mezbûr Mehmed Bey b. Abdullah’ın mersûm Ömer Beşe’den semen-i merkūm ile iştirâ eylediği bârgirdir, bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri makbûle olup, mûcebi ile semen-i merkūmun edâsıyla hükm olunup, mâ vaka‘a bi’t-taleb ketb olundu. Tahrîren fi’l-yevmi’s-sâlis min Cemâziyelâhir li sene seb‘a ve ışrîn ve elf. Şuhûd[ü’l-hâl]: Osman Beşe er-râcil, Ali Beşe er-râcil, Ali Beşe b. Veli er-râcil, Mehmed Beşe b. Abdullah er-râcil, Abdülkerim b. Abdullah er-râcil, Murad b. Mehmed, Memi Beşe b. ( ) er-râcil, İbrahim b. Kasım Kul oğlu ve gayruhüm.