İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 279 Hüküm no: 384 Orijinal metin no: [43a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Ahmed Veli’nin Piyâle Paşa Vakfı’ndan icâreteynli at değirmenini el-Hâc Mehmed b. Yusuf’a kiraladığı El-Hâc Ahmed b. Veli nâm kimesne mahfil-i kazâda hâmilü’l-kitâb Mehmed b. Yusuf nâm kimesne mahzarında ikrâr ve takrîr-i kelâm edip, merhûm Piyâle Paşa vakfından olup mahmiye-i İstanbul’da Sagīr Yahya mahallesinde vâki‘ vâkıf-ı sâlife intimâ’ ile tahdîd ve tavsîfden müstağnî ve icâre-i mu‘accele ve yevmî yirmi akçe ücret-i müeccele ile yedimde ve tasarrufumda olan at değirmenini, tevâbi‘ ve levâhıkı ve otuz bin râyic-i fıddî sermâye ile târih-i kitâb şehri gurresinden iki sene tamamına değin yevmî ellişer akçe ücret-i müeccele ile mezbûr Mehmed’e îcâr ve teslîm etdim, mezbûr Mehmed dahi vech-i merkūm üzre istîcâr ve tesellüm etti dedikde, mezbûr el-Hâc Ahmed’i ikrâr-ı meşrûhunda mezbûr Mehmed dahi vicâhen tasdîk ettikden sonra takrîr-i merâm edip, zikr olunan yevmî elli akçe ücretin yirmi akçesin cânib-i vakfa ve otuz akçesin mezbûr el-Hâc Ahmed’e edâya ta‘ahhüd etmeğin, mâ hüve’l-vâki‘ gıbbe’t-taleb ketb ü tahrîr olunup yed-i tâlibe def‘ olundu. Tahrîren fi’l-yevmi’r-râbi‘ min Cemâziyelâhir li sene seb‘a ve ışrîn ve elf. Şuhûd[ü’l-hâl]: Kurd b. Ali, el-Hâc Bedreddin eş-şehîr Basravî?, Abdi b. Abdullah el-kethüdâ, el-Hâc Şehabeddin [b.] el-Hâc Mustafa, el-Hâc Abdullah b. Ali.