İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 280 Hüküm no: 385 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiracısı Mustafa Çavuş b. Ahmed’in tamir ettiği Ahmed Paşa Vakfı’na ait evin keşfi Mahmiye-i İstanbul’da Topkapısı dâhilinde vâki‘ merhûm Ahmed Paşa vakfından olup vâkıf-ı sâlife intimâ’ ile tahdîd ve tavsîfden müstağnî olan menzilde, icâre-i mu‘accele ve müeccele ile sâkin olan mefharü’l-asâkir ve’l-cüyûş hâfızu’l-kitâb Mustafa Çavuş b. Ahmed, meclis-i şer‘-i şerîfe hâzır olup takrîr-i kelâm ve bast-ı merâm edip, menzil-i mezkûr mürûr-ı eyyâm ve kürûr-ı a‘vâm hasebiyle harâb ve ta‘mîre muhtâc oldukda, cânib-i vâkıfdan ta‘mîrine müsâ‘ade olmamağın, kend[üm] mâlım ile ta‘mîr edip, ba‘dehû sarf eylediğim meblağ taraf-ı vakfda icâre-i mu‘accelesine mahsûb olmak üzre vakf-ı mezbûr mütevellîsi Mustafa Çelebi b. Şaban izin vermekle, mukaddemâ üzerine nâ’ib ve muhammin getirip on sekiz bin akçe menzil-i mezkûrûn cümle nakzını tahmîn ve takvîm edip, ben dahi ta‘mîri lâzım olan mevâzi‘-i adîdesini ta‘mîr ve tecdîd etmiş idim. El-hâletü hâzihî savb-ı şer‘-i mübînden üzerine varılıp vâki‘ hâl keşf ve tahmîn ve mertebe-i tahammülü ta‘yîn olunmasın taleb ederim dedikde, cânib-i şer‘-i mübînden Mahmud Efendi irsâl olunup hâssa mi‘mârlardan Üstâd Ali b. Abdülmennân ve zeyl-i kitâbda mastûrü’l-esâmi Müslimîn ile üzerine varıp, menzil-i mezkûrûn cümle sakfını mesâha eylediklerinde, tûlen ve arzan hesâb-ı şatrancî üzre bin dört yüz doksan altı zirâ‘ olup, her zirâ‘ı otuz akçeden kırk dört bin sekiz yüz seksen akçe, duvarları dahi mesâha olundukda tûlen ve arzan bi hesâb-ı mezbûr dokuz yüz altmış altı zirâ‘ olup her zirâ‘ı onar akçeden dokuz bin altı yüz altmış akçe ve müceddeden binâ olunan küçük odanın sakfı mesâha olundukda, vech-i merkūm üzre tûlen ve arzan altmış zirâ‘ olup zirâ‘ı ellişer akçeden üç bin akçe ve zikr olunan odanın vech-i mezbûr üzre kırk dokuz zirâ‘ tuğla ile dolma duvarının her zirâ‘ına otuzar akçeden bin dört yüz yetmiş akçe ve tavanları tûlen ve arzan yedi yüz otuz zirâ‘ olup zirâ‘ı kırkar akçeden yirmi dokuz bin iki yüz ve yüz seksen beş zirâ‘ kaldırımına zirâ‘ı on üçer akçeden iki bin dört yüz beş akçe ve üç yüz üç dâne bahçenin dizme parmaklarının dânesi sekiz akçeden iki bin dört yüz yirmi dört akçe ve yüz yirmi iki zirâ‘ asma çardağına zirâ‘ı yirmişer akçeden iki bin dört yüz kırk akçe ve üç yüz kırk iki zirâ‘ bağçe duvarının sakfı ta‘mîre üç bin dört yüz yirmi akçe ve yetmiş zirâ‘ tuğla döşemesine on beş akçeden bin elli akçe ve altı pencerelerine cemî‘-i levâzımıyla beş bin dört yüz akçe ve şadırvanına cemî‘-i mühimmâtıyla altı bin akçe ve elli beş zirâ‘ su yoluna zirâ‘ı altmış akçeden üç bin üç yüz akçe ve kenîfine üç bin akçe, mevâzi‘-i mezbûrenin cem‘an yüz on yedi bin altı yüz kırk dokuz akçe ile ta‘mîre tahammülü olduğun mi‘mâr-ı mezbûr vesâir ahâlî-i vukūf ve erbâb-ı ebniye ve sukūf haber verdiğin mevlânâ-yı merkūm mahallinde tahrîr edip, ba‘dehû gelip mahfil-i kazâda inhâ ve takrîr etmeğin, meblağ-ı merkūm vech-i sâbık üzre taraf-ı vakıfda menzil-i mezkûrûn icâre-i mu‘accelesine mahsûb olmak üzre bu hurûf ketb olundu. Tahrîren fî evâhiri Cemâziyelevvel li sene seb‘a ve ışrîn ve elf. Şuhûd[ü’l-hâl]: Es-Seyyid Derviş Mehmed Efendi, Berviş Çavuş, Esad Efendi, Osman Çavuş ve gayruhüm.