İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 285 Hüküm no: 392 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun’un rûhuna Kur’ân okuyanlara, vakfiyesi doğrultusunda yapılması Mahmiye-i İstanbul’da merhûme Ayşe Hâtun nâm sâhibetü’l-hayr rûhiyçün, yevmî birer buçuk akçe ile huzûrunda birer cüz’-i şerîf tilâvet eden Himmet b. Receb ve Bâli b. Veli ve Ali b. Abdullah ve Mehmed b. Mehmed nâm kimesneler meclis-i şer‘-i şerîfde hâlâ merhûme-i mezbûrenin vakfına mütevellî olan fahrü’l-fuzalâ eş-Şeyh Seyfullâh Efendi b. Sâlih mahzarında takrîr-i kelâm edip, merhûme-i mesfûrenin vakfiye-i ma‘mûlün-bihâsında cüz’-i şerîf tilâvet edenlere yevmî birer buçuk akçe vazîfe verile deyû mukayyed ve mastûr iken, merkūm Seyfullâh Efendi ayda kırkar akçeden ziyâdesini vermede ta‘allül eder, suâl olunup tenbîh-i şer‘î kılınmak taleb ederiz dediklerinde, gıbbe’s-suâl mezbûr Seyfullâh Efendi cevâbında, fi’l-hakīka vâkıfe-i mezbûrenin vakfiyesinden yevmî birer buçuk akçe vazîfe verile deyû mastûrdur dedikde, şart-ı vâkıfe üzre mezbûrların vazîfe-i mu‘ayyenelerin teslîm etmeye mezbûr Seyfullâh Efendi’ye tenbîh-i şer‘î kılınıp, mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâbi‘ min Cemâziyelâhir li sene seb‘a ve ışrîn ve elf. Şuhûd[ü’l-hâl]: el-Hâc Ali b. Abdullah, el-Hâc Bayezid b. Veli, Hasan b. Ali, Mehmed b. Cafer, Murad b. Mehmed, Mustafa b. Cafer ve gayruhüm.