İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 284 Hüküm no: 391 Orijinal metin no: [44a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâcce Hâtun Vakfı’na ait Zeyrek’teki çifte hamamın, Mustafa b. Musa’ya kiraya verildiği Merhûme Hâcce Hâtun vakfından berât-ı pâdişâhî ile bi’l-fi‘il mütevellî olan fahrü’l-eşbâh Ramazan Bey b. Abdülkerim meclis-i şerîfde râfi‘ü’l-kitâb Mustafa b. Musa nâm râcil muvâcehesinde takrîr-i kelâm ve ta‘bîr ani’l-merâm edip, vakf-ı mezbûrdan olup mahmiye-i İstanbul’da Zeyrek nâm mevzi‘ kurbunda Hızır Bey mahallesi demekle ma‘rûf mahallede vâki‘ vâkıfe-i mûmâ-ileyhâya intimâ’ ile tahdîd ve tavsîfden müstağnî olan çifte hamamın, yılda otuz altı bin akçe icâre-i mu‘accele ile müste’cir-i olan Mustafa Çelebi’nin müddet-i icâresi tamam olup, merkūm Mustafa b. Musa yılda kırk [bin] akçe icâre ile tâlib olup, vakfa nef‘i olmağın hamam-ı merkūmu tevliyyetim hasebiyle mersûm Mustafa b. Musa’ya her sene kırk bin akçe icâre-i müeccele ile târih-i kitâbdan üç sene tamamına değin îcâr ve ba‘de’t-tahliyye teslîm eyledim, merkūm dahi istîcâr ve kabûl ve kabz edip ve icâre-i mezbûreden her re’s-i şehrde zimmetine lâzım gelen üçer bin üçer yüz otuz akçeyi her ay tamamında vermeye müte‘ahhid oldu dedikde, mâ vaka‘a gıbbe’t-taleb ketb olundu. Hurrire fi’l-yevmi’s-sâbi‘ min Cemâziyelâhir li sene seb‘a ve ışrîn ve elf. Şuhûd[ü’l-hâl]: Ahmed Çelebi b. Sâlih, Ahmed Bey b. el-hammâmî, Mahmud Çelebi el-Bevvâbü’s-sultânî, Mehmed b. Mehmed el-hammâmî, Receb Çelebi b. Mustafa ve gayruhüm.