İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 287 Hüküm no: 396 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayasofya’daki vakıf evin, İmâm Mehmed Efendi’ye verildiği Mahmiye-i İstanbul’da Ayasofya-i kebîr mahallesinde vâki‘ bir tarafdan Abdi Çelebi mülkü ve bir tarafdan Ahmed Çelebi mülkü ve bir tarafdan Çâşnigir Mustafa Ağa mülkü ve bir tarafdan tarîk-i âm ile mahdûd olup, fevkānî ve tahtânî büyût-ı müte‘addideyi müştemil olan menzili ashâb-ı hayrâtdan ( ) vakf eyleyip, süknâsını rûhiyçün her senede hatm-i şerîf tilâvet olunmak üzre ulemâdan bir fakīr kimesneye şart eyleyip, menzil-i mezbûrda ber-mûceb-i şart-ı vâkıf bundan akdem Ayasofya-i kebîr câmi‘-i şerîfinde müezzin olan Mehmed sâkin iken fevt olup, menzil-i mezbûr mahlûl olmağın, işbu râfi‘ü’l-kitâb câmi‘-i mezbûrda hâlâ imâm olan fahrü’l-e’imme Mehmed Efendi b. Tâceddin âlim ve fakīr ve sâlih ve mütedeyyin ve meskene etemm-i ihtiyâcı zâhir ve mütebeyyin olmağın tevcîh olundu. Zabt ve tasarrufiyçün bu vesîka ketb ve yedine def‘ olundu. Tahrîren fî evâili Cemâziyelâhir li sene seb‘a ve ışrîn ve elf. Şuhûd[ü’l-hâl]: Fahrü’l-hutebâ’i’l-kirâm Mahmud Efendi b. el-Hâc Mehmed, Ce[ma]leddin Efendi b. Abdünnebî el-hatîb, Umdetü’l-müderrisîn Yahya Efendi b. Mahmud, Derviş Çelebi el-kâtib, Ezânî Efendi el-kadı, Sa‘d b. Halîfe el-müezzin, Nizâmî Halîfe el-müezzin ve gayruhüm.