İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 288 Hüküm no: 399 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hürrem Çavuş Vakfı mütevellisi Osman Çelebi’nin kızlarının vakfa paralarını yeni mütevelli Mahmud Çavuş b. Ahmed’e teslim ettikleri Mahmiye-i İstanbul’da merhûm Hürrem Çavuş vakfına mütevellî iken vefât eden Osman Çelebi’nin sulbiye kızları Fâtıma ve Hatice nâm sagīrelerin vasiyy-i şer‘îleri olan Ümmühâni Hâtun bt. Mustafa tarafından husûs-ı âtîye vekîl olup, mâ hüve nehcü’s-sübût şer‘an vekâleti sâbite olan fahrü’l-kuzât Mustafa Efendi b. Mehmed, mahfil-i kazâda vakf-ı mezbûra hâlâ mütevellî olan Mahmud Çavuş b. Ahmed muvâcehesinde takrîr-i kelâm edip, mütevellî-i mezbûr Osman Çelebi vefât ettikden sonra ben vasiyy-i merkūmun vekîli olmağla, yüz on sekiz bin iki yüz elli dört akçe ve bin [yirmi] altı senesi ribhinden dört bin yüz akçe ve odalar icâresinden altı yüz akçe ve der-kîse beş yüz akçe mersûm Mahmud Çavuş’a teslîm eyledim, suâl olunup takrîri tahrîr olunmasını taleb ederim dedikde, gıbbe’s-suâl mersûm Mahmud Çavuş fi’l-hakīka vech-i merkūm üzre vakf-ı mezbûrdan zikr olunan meblağları vekîl-i mezbûr yedinden alıp kabz eyledim dedikde, mâ hüve’l-vâki‘ gıbb[e’t-taleb ketb olundu]. Şuhûdü’l-hâl: Ali Bey b. Abdullah, Ömer b. Muharrem, Şaban b. Hasan, Mustafa b. Hacı Veli, Ali Bey b. Sefer, Mahmud Bey b. Abdullah, Deveci Mahmud.