İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 291 Hüküm no: 406 Orijinal metin no: [46a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Akıl hastası Meryem Hâtun bt. Sadi’nin kocası Abdülkadir b. Durmuş’daki alacaklarının vasîsi tarafından alındığı Mahmiye-i İstanbul mahallâtından merhûm Akşemseddin mahallesi sâkinelerinden Meryem Hâtun bt. Sadi nâm mecnûnenin kıbel-i şer‘den mansûb vasîsi olan el-Hâc Süleyman b. Abdullah nâm kimesne meclis-i şer‘-i kavîmde, hâmil-i hâze’l-kitâb mezbûre Meryem Hâtun’un bi’l-fi‘il zevci olan Abdülkādir b. Durmuş nâm kimesne muvâcehesinde bi’l-vesâye takrîr-i kelâm ve ta‘bîr ani’l-merâm kılıp, vasîsi olduğum merkūme Meryem’in bundan akdem bir mor ferâce ve bir kumaş kaftan ve iki nâfte zıbın ve bir gümüşlü kuşak ve bir çift mâ’î kemhâ peşkir ve bir peçesi zâyi‘ oldukda, zevc-i mezbûr Abdülkādir’i mazanne ittihâz edip, vesâyet-i mahkiyem hasebiyle merkūmdan da‘vâ ve taleb ettiğimde, merkūm Abdülkādir inkâr edip beyyineden aczim olmağla ve mezbûr Abdülkādir’in yemîn etmesi mukarrer olmağın bu takdîrce sulh mezbûre Hâtuna enfa‘ olmağla, muslihûn tavassutu ile an inkâr bin beş yüz nakd akçe ve bin akçe kıymetli bir kumaş kaftan vermek üzre mâbeynimizi ıslâh ve tevfîk eylediklerinde, ben dahi vesâyet-i mahkiyem hasebiyle sulh-ı mezbûru kabûl ve bedel-i sulh olan meblağ-ı merkūm ile mezkûr kaftanı merkūm Abdülkādir’in yedinden ahz u kabz edip, husûs-ı mezbûrdan merkūm Abdülkādir’in zimmetini ibrâ-i âm ile ibrâ ve ıskāt-ı tâm ile ıskāt etdim. Ba‘de’l-yevm husûs-ı mezbûra müte‘allik benden asâleten veya vekîlimden vekâleten da‘vâ sâdır olursa lede’l-hükkâmi’l-kirâm mesmû‘a olmaya dedikde, mûcebince merkūmu ikrâr-ı meşrûhunda mezbûr Abdülkādir vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb olundu. Tahrîren fî evâili Cemâziyelâhir li sene seb‘a ve ışrîn ve elf. Şuhûdü’l-hâl: Mehmed Halife [b.] Hasan el-imâm, Resûl Halife [b.] Mustafa el-müezzin, el-Hâc Ali [b.] Abdülkādir, el-Hâc İsmail [b.] Mehmed, Mehmed [b.] Kasım, Ali [b.] Oruç ve gayruhüm.