İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 292 Hüküm no: 407 Orijinal metin no: [46a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nâzenin bt. Abdullah’ın, Ahmed Efendi b. Uğurlu’dan aldığı borç karşılığında rehin olarak bıraktığı eşyaların tescili Mahmiye-i Kostantıniyye mahallâtından Manisa[lı] Çelebi mahallesi sâkinelerinden işbu râfi‘atü’l-kitâb Nâzenin bt. Abdullah meclis-i şerîfde Süleyman b. Mehmed el-yesârî mahzarında takrîr-i merâm edip, bundan akdem Ahmed Efendi b. Uğurlu nâm imâmdan üç bin üç yüz elli akçeyi alâ-tarîki’l-karz alıp kabz edip, bir siyah kılıncı ve kadîfe kaplı kılıncı mezbûr Ahmed yedinde meblağ-ı mezkûr mukābelesinde rehin vaz‘ edip, ba‘dehû mezbûr Ahmed âhar diyâra gitmek lâzım geldikde, mezbûr Süleyman Çelebi’yi tarafından zimem-i nâsda olan hukūkunu kabza ve yedinde olan rihân-ı makbûzamı ashâbına teslîme vekîl edip, zikr olunan kılınçları mezbûr Süleyman Çelebi’ye teslîm eyleyip, ben dahi zikr olunan siyah kılıncı mezbûr Süleyman Çelebi yedinden alıp, mukābelesinde bir âhar kılınç ve gümüş çengelli bir kuşak teslîm eylemiş idim. Hâlâ deyn-i mesfûru merkūm Ahmed Efendi inkâr eylemişdir, murâd etdiğimden sonra teslîm ettiğim kılıncı ve gümüş çengelli kuşağı mezbûr Ahmed Efendi inkâr eylemişdir, suâl olunup mezbûr Süleyman Çelebi’nin ikrâr ve takrîri tahrîr olunmak matlûbumdur dedikde, gıbbe’s-suâl mezbûr Süleyman Çelebi cevâbında, fi’l-vâki‘ zikr olunan kılıncı ve gümüş çengelli kuşağı merkūme Nâzenin yedinden alıp kabz edip, ben dahi mezbûr Ahmed Efendi’nin câriyesi Üftâde’ye teslîm etdim deyicek, vâki‘ hâl zabten li’l-makāl ketb olundu. Tahrîren fi’l-yevmi’s-sâlis aşer min Cemâziyelâhir li sene seb‘a ve ışrîn ve elf. Şuhûdü’l-hâl: İbrahim [b.] Receb, Receb Çavuş [b.] İsmail, Mehmed [b.] Eyüb, Hasan [b.] Ali, Hasan [b.] Mahmud, Hacı(?) [b.] Süleyman.