İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 296 Hüküm no: 414 Orijinal metin no: [47a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. İbrahim’in, Şaban Bey b. Hasan’ın yanında bulduğu kölesini aldığı Vilâyet-i Rumeli’nde Balçık nâm kasaba sâkinlerinden Mustafa Efendi b. İbrahim meclis-i şer‘de Şaban Bey b. Hasan nâm cündî mahzarında üzerine takrîr-i da‘vâ edip, işbu hâzır bi’l-meclis olan açık kaşlı elâ gözlü ak benizli orta boylu Eflakiyyü’l-asl Piyâle b. Abdullah benim abd-i memlûküm idi, târih-i kitâbdan sekiz ay mukaddem mülkümden ibâk etmiş idi. Hâlâ mezbûr Şaban Bey’in yedinde buldum, suâl olunup şer‘le alıverilmek taleb ederim dedikde, gıbbe’s-suâl mezbûr Şaban cevâbında, işbu abd-i merkūmu ben Dîvân-ı hümâyûn kâtiblerinden Mustafa Çelebi b. Sinan nâm kimesneden beş bin sekiz yüz akçeye iştirâ etdim, müdde‘î-i mersûmun abdi olup mülkünden ibâk ettiği ma‘lûmum değildir deyû cevâb vericek, müdde‘î-i mesfûrdan takrîrine muvâfık beyyine taleb olundukda, udûl-i Müslimînden Hasan Efendi b. el-Hâc Fazlullah ve Hüseyin Efendi b. Mustafa li ecli’ş-şehâde meclis-i şer‘a hâzırân olup gıbbe’l-istişhâd, fi’l-vâki‘ işbu mezbûr Piyâle müdde‘î-i merkūm Mustafa Efendi’nin mülküdür, târih-i kitâbdan sekiz ay mukaddem ibâk etti, husûs-ı mezkûra şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye şehâdetleri makbûle oldukdan sonra abd-i mezkûru vücûh-ı şer‘iyyeden bir vechile mülkünden ihrâc etmediğine müdde‘î-i merkūma yemîn teklîf olundukda, ol dahi yemîn billâhi te‘âlâ etmeğin, abd-i mersûm müdde‘î-i merkūma hükm olunup, mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Cemâziyelâhir li sene seb‘a ve ışrîn ve elf. Şuhûdü’l-hâl: Yahya Efendi b. Abdülvehhâb, Ebûbekir Efendi b. Süleyman, İbrahim Efendi b. Veli, Ebûbekir Çelebi b. İsmail, Hasan b. Ahmed.