İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 296 Hüküm no: 413 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülfidar bt. Korkud’un, kocası Bayram b. Cihân’ın tarafından dövüldüğü Kıbtiyân tâ’ifesinden Gülfidar bt. Korkud nâm hâtun zevci Bayram b. Cihân nâm kıbtîyi meclis-i şer‘a ihzâr ve mahzarında takrîr-i da‘vâ edip, mezbûr Bayram beni fuzûlî satır ile darb eyledi, suâl olunup hakkım alıverilmek taleb ederim dedikde, gıbbe’s-suâl ve akībü’l-inkâr, mezbûreden da‘vâsına mutâbık beyyine taleb olundukda, udûl-i Müslimînden el-Hâc Ali b. Yakub ve nisâ tâ’ifesinden Fâtıma bt. Mustafa ve Selime bt. Mustafa nâm kimesneler meclis-i şer‘a li ecli’ş-şehâde hâzırûn olup istişhâd olunduklarında, fi’l-vâki‘ mezbûre Gülfidar’ı zevci merkūm Bayram bizim huzûrumuzda bî-vech-i şer‘î satır ile darb eyledi, biz bu husûsa şâhidleriz, şehâdet-i şer‘iyye dahi ederiz deyû edâ-i şehâdet-i şer‘iyye eylediklerinde, gıbbe ri‘âyet-i şerâ’iti’l-kabûl şehâdetleri hayyiz-i kabûlde vâkı‘a olup, li ecli’t-takrîr, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min Cemâziyelâhir li sene seb‘a ve ışrîn ve elf. Şuhûdü’l-hâl: Hızır b. Abdullah, Yusuf b. Bayram, Ali b. Abdullah, Mehmed b. Ali.