İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 299 Hüküm no: 418 Orijinal metin no: [47b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Abdullah’ın, Rimini bt. Nikola’da alacağı olduğu Mahmiye-i Kostantıniyye mahallâtından Fethiye mahallesi sâkinlerinden işbu râfi‘ü’l-kitâb Ahmed Bey b. Abdullah meclis-i şer‘de Rimini bt. Nikola mahzarında da‘vâ edip, mezbûre Rimini zimmetinde deyn-i şer‘îden bin elli akçe hakkım olup, bundan esbak ikrâr dahi eylemişdir, suâl olunup alıverilmesini murâd ederim dedikde, gıbbe’s-suâl ve akībü’l-inkâr, gıbbe’l-istişhâd udûl-i Müslimînden mahalle-i mezbûre ahâlîsinden İsmail b. Ahmed ve Mehmed Ağa mahallesinden Mehmed b. Ali nâm kimesneler meclis-i şer‘a li ecli’ş-şehâde hâzırân olup gıbbe’l-istişhâd, fi’l-vâki‘ mezbûre Rimini bizim huzûrumuzda müdde‘î-i mezbûra deyn-i şer‘îden bin elli akçe deynim vardır deyû ikrâr etti, bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiye mûcebi ile tenbîh birle, mâ vaka‘a ketb olundu. Hurrire fî evâsıtı Cemâziyelâhir li sene seb‘a ve ışrîn ve elf. Şuhûdü’l-hâl: Murad b. Mehmed, Eyüb b. Mehmed, Mehmed b. Eyüb, Hamza b. Mustafa ve gayruhüm mine’l-huzzâr.