İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 304 Hüküm no: 429 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nisâ Hâtun bt. Mahmud’un, Hoca Üveys Vakfı’na ait evin tasarruf hakkını Hâssa bostancılarından Mehmed’e devrettiği Nisâ Hâtun bt. Mahmud mahfil-i kazâda Hâssa bostâncılardan sâhibü’l-kitâb Mehmed b. ( ) nâm acemi tarafından husûs-ı âtîye vekîl olup, vekâleti Mustafa b. Hasan ve İbrahim b. Perver şehâdetleriyle şer‘an sâbite olan fahrü’l-a‘yân Mehmed Ağa b. Veli mahzarında ikrâr edip, mahmiye-i İstanbul’da Hocapaşa câmi‘i kurbunda vâki‘, bir tarafı hâlâ Sadrazam ve Serdâr-ı ekrem Halil Paşa hazretleri sarayı ve bir tarafı Ahmed b. Abdullah mülkü ve bir tarafı Hâkime Hâtun mülkü ve bir tarafı tarîk-i âm ile mahdûd Hoca Üveys vakfından olup, icâre-i mu‘accele ve müeccele ile tasarrufumda olan buyût-ı müte‘addideyi müştemil menzilin hakk-ı tasarrufu mütevellî-i vakf-ı mezbûr ma‘rifetiyle mezbûr Mehmed[‘e] tefvîz ve teslîm eyledim, ol dahi tefevvüz ve tesellüm edip mukābele-i tefvîzinde vekîl-i mezbûr yedinden merkūm Mehmed mâlından otuz beş bin akçeyi alıp kabz eyledim, min ba‘d menzil-i mezbûrun hakk-ı tasarrufu mersûm Mehmed’indir dedikde, mukırr-ı mezbûrun ikrâr-ı meşrûhun vekîl-i mesfûr vicâhen tasdîk edip, mâ vaka‘a bi’t-taleb ketb olundu. Tahrîren fi’l-yevmi’l-ışrîn min Cemâziyelâhir li sene seb‘a ve ışrîn ve elf. Şuhûdü’l-hâl: Süleyman Çavuş, Halil Çelebi, Hüsrev b. Abdullah, Receb Beşe b. Abdullah.