İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 305 Hüküm no: 430 Orijinal metin no: [49a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah ve Mavrodi v. Dimo’nun Mehmed b. Hızır’ın satacağı atına binerek firar eden Ahmed’e kefîl oldukları Sâhibü’l-kitâb Mehmed b. Hızır mahfil-i kazâda Mehmed b. Abdullah ve Mavrodi v. Dimo nâm kimesneler muvâcehelerinde üzerlerine da‘vâ edip, bundan akdem mezbûrân Mehmed ve Mavrodi, Ahmed nâm kimesne ile Atpazarı’na gelip bin altı yüz râyic akçe kıymetli bir kır bârgiri iştirâya tâlib olup, mezbûr Ahmed binmek murâd edip ben rızâ vermediğimde, mezbûrlar Mehmed ve Mavrodi bana bârgiri veresin, firâr ederse biz zâmin[iz] dediklerine binâen binmeğe rızâ verdim, mezbûr Ahmed binip firâr etti. Hakīkat-i hâl suâl olunup ihkāk-ı hak olunmak taleb ederim dedikde, gıbbe’s-suâl mezbûrlar Mehmed ve Mavrodi hâl minvâl-i meşrûh üzre idiğini bi’l-külliye inkâr edip, müdde‘î-i mezbûrdan da‘vâsına muvâfık beyyine taleb olundukda, udûl-i Müslimînden İbrahim b. Musa ve Nuh b. Musa nâm kimesneler fi’l-hakīka mezbûrlar Mehmed ve Mavrovi bizim huzûrumuzda mersûm Ahmed bârgire bindiği vakit korkmayasın firâr edip bârgirin zâyi‘ olursa biz zâmin[iz] dediklerine binâen merkūm Mehmed binmeğe rızâ vermiş idi, bu husûsa şâhidleriz, şehâdet dahi ederiz deyû edâ-i şehâdet-i şer‘iyye edip, gıbbe’t-ta‘dîl şehâdetleri hayyiz-i kabûlde vâkı‘a oldukdan sonra mezbûrlar Mehmed ve Mavrovi dahi hâl minvâl-i meşrûh üzre olduğuna ve zımnında mukırrlar olmağın edâsına hükm olundu. Fî 10 Cemâziyelâhir [sene 1027]. Şuhûdü’l-hâl: Mustafa b. Mehmed, Murad b. Mehmed, Osman b. Abdullah, İshak b. Veli.