İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 309 Hüküm no: 436 Orijinal metin no: [49b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İmre v. Yani’nin Hacı Mehmed Vakfı’na olan borcunun terekesinden tahsil edilmesi Mahmiye-i İstanbul’da vâki‘ merhûm el-Hâc Mehmed vakfına bi’l-fi‘il mütevellî olan işbu râfi‘ü’l-kitâb Ramazan b. Hasan meclis-i şer‘de, bundan akdem mürd olan İmre v. Yani nâm zimmînin sulbî sagīre kızları Roşin ve Turkadın nâm sagīrelerin cânib-i şer‘den mansûbe vasî ve vâlideleri ve yine mürd-i mezbûrun zevcesi Seltan bt. Mihal nâm zimmîye mahzarında üzerine takrîr-i da‘vâ edip, bundan akdem mürd-i mezbûr zimmetinde mâl-ı vakf-ı mezbûrdan cihet-i karzdan ve çuka bahâsından cem‘an on bir bin akçe olup, meblağ-ı mezbûrdan yedi bin akçesin hayâtında mezbûr İmre’den alıp kabz edip bâkī dört bin akçe kalmış idi. Hâlâ meblağ-ı mezbûr dört bin akçeyi tevliyyetim hasebi ile muhallefât-ı mürd-i mezbûrdan mezbûreden taleb ederim dedikde, gıbbe’s-suâl ve akībü’l-inkâr mütevellî-i mezbûrdan takrîrine muvâfık beyyine taleb olundukda, zimmî tâ’ifesinden Karagöz v. Karlı ve Pehlivan v. Durmuş nâm zimmîler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ mâl-ı vakf-ı mezbûrdan mürd-i mezbûr İmre zimmetinde cihet-i karzdan ve çuka bahâsından on bir bin akçe olup, meblağ-ı mezbûrdan yedi bin akçesin hayâtında mezbûr İmre’den mütevellî-i mezbûr Ramazan huzûrumuzda alıp kabz edip dört bin akçesi zimmetinde bâkīdir, mezbûr mütevellî için hakk-ı mütâlebe vardır, husûs-ı mezbûra şâhidleriz, şehâdet dahi ederiz deyû edâ-i şehâdet-i şer‘iyye ettiklerinde şehâdetleri hayyiz-i kabûlde vâkı‘a olmağın, ba‘de’t-tahlîfi’l-âdî mûcebince meblağ-ı mezbûr muhallefât-ı mürd-i mezbûrdan hükm olundu. Hurrire fi’t-târihi’l-mezbûr. Şuhûdü’l-hâl: El-Hâc Ali, İbrahim b. Receb, Eyüb b. Hamza, Mustafa b. Osman, Mehmed b. Ahmed, Receb b. Musa.