İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 308 Hüküm no: 435 Orijinal metin no: [49b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ahmed’e, annesinden kalan evin Mustafa Çelebi b. Ahmed Çelebi’ye satılması Mahmiye-i İstanbul mahallâtından Şeyh Ferhad mahallesinde sâkine iken bundan akdem vefât eden Asiye bt. Hüseyin Ağa nâm müteveffânın sadriye kızı Ayşe bt. Ahmed nâm sagīrenin tesviye-i umûru için vasiyy-i muhtârı olan Kadri Çelebi b. Mehmed meclis-i şer‘de, işbu hâfizü’l-kitâb Mustafa Çelebi b. Ahmed Çelebi muvâcehesinde ikrâr ve takrîr-i kelâm edip, beş bin akçe icâre-i mu‘accele ve yevmî dört akçe icâre-i müeccele ile mahalle-i mezbûrede vâki‘, bir tarafdan Osman Çavuş mülküne ve bir tarafdan Veznedâr Mahmud Çelebi vakfına ve bir tarafdan Sadri Çavuş vakfına ve bir tarafdan tarîk-i âmma müntehî olan iki bâb fevkānî ve iki bâb tahtânî evleri ve bir ahırı ve fırını ve bir şeh-nişîn ve bir sofayı müştemil olup, sagīre-i mezbûre vâlidesi merkūme Asiye’den intikāl eden menzil harâb olup ve ba‘zı duvarları yıkılıp binâsına sagīre-i mezbûrenin nukūd ve urûzdan mâlı olmadığı ecilden bey‘ olunmak her vechile sagīre-i mezbûreye enfa‘ olmağın, Sûk-ı Sultânî’de tâlibîn ve râgıbîne arz olunup, bi’l-âhire dokuz bin üç yüz nakd-i râyic fi’l-vakt akçeye karâr edip, rağabât-ı nâs bi’l-külliye munkatı‘a olup, semen-i merkūm yevm-i vukū‘-ı bey‘de semen-i misli idiği ihbâr-ı Müslimîn ile mütehakkik olup, hakk-ı karârı üzre zikr olunan menzili meblağ-ı mezbûr dokuz bin üç yüz akçeye bey‘-i kat‘î ile vesâyetim hasebiyle merkūm Mustafa Çelebi’ye bey‘ edip, ol dahi semen-i merkūm ile iştirâ ve kabûl eyleyip, meblağ-ı mezbûru yedinden bi’t-tamâm kabz eyledim. Min ba‘d menzil-i merkūmda sagīre-i mezbûrenin medhali ve alâkası kalmamışdır dedikde, vasiyy-i mezbûrun ikrâr-ı meşrûhunu merkūm Mustafa Çelebi bi’l-muvâcehe tasdîk edicek, mâ hüve’l-vâki‘ bi’t-taleb ketb ve terkīm olunup yed-i tâlibine vaz‘ olundu. Tahrîren fi’l-yevmi’s-sâmin aşer min Cemâziyelâhir li sene seb‘a ve ışrîn ve elf. Şuhûdü’l-hâl: Mehmed Çelebi b. Üveys, Mustafa b. Ahmed, Ahmed b. İsa, Yusuf b. Abdullah.