İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 320 Hüküm no: 459 Orijinal metin no: [52a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdülkadir’in Mustafa’ya borç verdiği Yenibahçe mahallesi sâkinelerinden Fâtıma bt. Abdülkādir mahfil-i kazâda, işbu hâmilü’l-kitâb el-Hâc Bayram b. Durmuş mahzarında da‘vâ edip, bundan akdem es-Seyyid Mustafa nâm kimesne yedimden bin beş yüz akçe istikrâz edip, ben dahi ikrâz eylediğimde meblağ-ı merkūmu emr ve kabûlü hâviye kefâlet ile kefîl olmuşdu, kefâleti hasebiyle meblağ-ı merkūmu taleb ederim dediğinde, gıbbe’s-suâl mezbûr el-Hâc Bayram cevâbında, hâl beynimizde bu minvâl üzre vâki‘ olup, lâkin sonra ben ve müdde‘iyye-i mezbûre ve medyûn-ı mezbûr üçümüz meclis-i vâhidde iken, mezbûr es-Seyyid Mustafa şecere-i siyâdetini dâ’in-i mezbûre yedinden meblağ-ı merkūm mukābelesinde rehin vaz‘ etmekle, müdde‘iyye-i mezbûre mahzar-ı şuhûdda [beni] kefâletden ihrâc etti deyip gıbbe’l-inkâr ve akībü’l-istimhâl Ali b. Necib ve Abdurrahman b. Hüseyin hâzırân olup, fi’l-vâki‘ üçü hâzırlar iken mezbûr es-Seyyid Mustafa şecere-i siyâdetini rehin vaz‘ edip, müdde‘iyye-i mezbûre kefâletden mezbûr el-Hâc Bayram’ı bizim huzûrumuzda ihrâc etti, bu husûsa şâhidleriz, şehâdet dahi ederiz dediklerinde, gıbbe’t-ta‘dîl ve’t-tezkiye şehâdetleri makbûle olup mûcebi ile müdde‘iyye-i mezbûre müdde‘â-aleyh-i mezkûra ta‘arruzdan men‘ olunup, mâ vaka‘a kayd olundu. Fi’t-târihi’l-mezbûr. Şuhûdü’l-hâl: Abdülcelîl b. Çalabverdi, Nebi b. İbrahim, Hasan b. Ahmed, İbrahim b. Receb ve gayruhüm.