İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 325 Hüküm no: 467 Orijinal metin no: [53a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İnebolu’lu Ahmed b. Abdünnebî’nin, Durmuş b. Musa ile alacak davasında, sulh olduğu Vilâyet-i Anadolu’da kasaba-i İnebolu sâkinlerinden Ahmed b. Abdünnebî nâm cündî meclis-i şer‘de işbu hâfızu’l-kitâb Durmuş b. Musa mahzarında ikrâr ve takrîr-i kelâm edip, bundan akdem mezbûr Durmuş’a iki bin beş yüz akçeye bir re’s siyah bârgir bey‘ edip, meblağ-ı mezbûrun bin akçesin ahz u kabz edip, bâkī bin beş yüz akçe hakkım mezbûr Durmuş’da kalıp taleb ettiğimde inkâr etmeğin, beynimizde münâza‘ât vâkı‘a olmuş idi. El-hâletü hâzihî beynimize muslihûn tavassut edip, an inkâr beni altı yüz nakd-i râyic fi’l-vakt akçeye sulh ettiklerinde, ben dahi sulh-ı mezbûru kabûl ve bedel-i sulh olan altı yüz akçeyi mersûm Durmuş yedinden bi’t-tamâm ahz u kabz edip, husûs-ı mezbûra müte‘allik da‘vâdan mersûm Durmuş’un zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm mazmûn-ı kitâba muhâlif benden veya vekîlimden da‘vâ sâdıre olursa lede’l-hükkâmi’l-kirâm mesmû‘a ve makbûle olmaya dedikde, mukırr-ı mezbûrun vech-i meşrûh üzre sudûr eden ikrârda merkūm Durmuş bi’l-muvâcehe tasdîk edicek, mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Abdürrezzak, İsa b. Musa, Mahmud Bâli b. Mehmed, İbrahim b. Receb.