İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 326 Hüküm no: 469 Orijinal metin no: [53a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Oruç b. Evranos’un, Mimar Sinan Vakfı’na ait dükkân ve üstündeki odanın tasarruf hakkını Yorgi v. Yani’ye sattığı Oruç b. Evranos nâm kimesne meclis-i şer‘-i şerîfde işbu sâhibü’l-kitâb Yorgi v. Yani mahzarında takrîr-i kelâm edip, mahmiye-i İstanbul’da Mimar Sinan mahallesinde vâki‘, merhûm Mimar Sinan vakfından olup icâre-i mu‘accele ve müeccele ile taht-ı icâremde olup iki tarafdan vakf-ı mezbûra ve bir tarafdan merhûm Kadızâde Efendi türbesine ve bir tarafdan tarîk-i âmma müntehî olan bir bâb bakkāl dükkânı ve üstünde olan bir bâb odanın hakk-ı tasarrufunu ma‘rifet-i mütevellî ile mezbûr Yorgi’ye tefvîz edip, ol dahi tefevvüz ve kabûl eyledikden sonra mukābilinde mezbûr Yorgi yedinden beş bin nakd-i râyic fi’l-vakt akçe alıp kabz eyledim, ba‘de’l-yevm mâdemki zikr olunan dükkânın icâresini cânib-i vakfa edâ eyleye, keyfe mâ yeşâ mutasarrıf ola dedikde, mukırr-ı mezbûrun vech-i meşrûh üzre sudûr eden ikrârın el-mukarru lehü’l-merkūm Yorgi bi’l-muvâcehe tasdîk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Cemâziyelâhir min şuhûri sene seb‘a ve ışrîn ve elf. Şuhûdü’l-hâl: Sefer Çelebi b. Bâli, Sinan b. Abdullah, Murad b. Mehmed ve gayruhüm.