İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 326 Hüküm no: 470 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merde bt. Yani’nin Marya’dan câriye bedelinden alacağı olduğu Mahmiye-i İstanbul’da Nişâncı mahallesi sâkinelerinden işbu hâmiletü’l-kitâb Merde bt. Yani nâm nasrâniye meclis-i şer‘-i şerîf-i şâmihü’l-imâdda Marya bt. ( ) nâm Yahudiye mahzarında takrîr-i da‘vâ edip, mezbûre Marya’nın zimmetinde beynimizde vasfı ve cinsi ilm-i şer‘î ile ma‘lûm câriye bahâsından bin beş yüz akçe hakkım ve yüz seksen akçe kıymetli bir beyaz kebem vardır, suâl olunup şer‘le alıverilmesini murâd ederim dedikde, gıbbe’s-suâl mezbûre Marya cevâbında, fi’l-vâki‘ müdde‘iyye-i mezbûrenin zikr olunan câriye bahâsından bin beş yüz akçesi ve yüz seksen akçe kıymetli bir kebesi zimmetimde var idi. Lâkin zikr olunan bin beş yüz akçenin bin akçesini mezbûrenin emri ile Âlem Hâtun’a def‘ ve teslîm etdim, mâ‘adâsı zimmetimdedir dedikde, müdde‘iyye-i mezbûre dahi istintâk olundukda def‘ u ref‘ emr ettiğini inkâr edip, mezbûre Marya’dan sıdk-ı cevâbına beyyine taleb olundukda, istimhâl etmeğin, mehl-i şer‘î ile imhâl olunup, mâ vaka‘a ketb olundu. Tahrîren fi’l-yevmi’s-sâmin ve’l-ışrîn min Cemâziyelâhir li sene seb‘a ve ışrîn ve elf. Şuhûdü’l-hâl: İbrahim b. Receb, Murad b. Mehmed, Çelebi b. Ahmed ve gayruhüm.