İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 327 Hüküm no: 471 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa câmiinin evinin İmâm es-Seyyid Emrullah Efendi’ye verilmesi Mahmiye-i İstanbul’da Âşık Paşa mahallesinde vâki‘ merhûm Hüseyin Ağa câmi‘-i şerîfinde bi’l-fi‘il imâm olan es-Seyyid Emrullah Efendi b. es-Seyyid Halil meclis-i şer‘-i kavîmde Ahmed b. Alâaddin nâm kimesne muvâcehesinde üzerine da‘vâ edip, mahalle-i mezbûrede vâki‘ olup bir tarafı İmâmzâde Efendi mülkü ve bir tarafı Ma[r]tiloszâdeler mülkü ve bir tarafı vakıf ev ve bir tarafı tarîk-i âm ile mahdûd olup, fevkānî ve tahtânî büyût-ı müte‘addideyi müştemil olup merhûm-ı mûmâ-ileyh vakf ve süknâsını câmi‘-i mezbûrda imâm olanlara şart ettiği menzili, bundan akdem câmi-i mezbûrda imâm olan Musli Çelebi meskene ihtiyâcı olmamağla, mezbûr Ahmed’in babası olup câmi‘-i mezbûrda müezzin iken vefât eden merkūm Alâaddin’e fâriğ olup, mezbûr dahi bir tarîk ile sâkin olurken fevt olup, imâmet-i merkūme bana sadaka olundu, zikr olunan menzil hakk-ı meşrûtum olup meskene dahi ihtiyâcım olmağın, hakīkat-i hâl mezbûr Ahmed’den suâl olunup menzil-i mezbûrdan ihrâc ve bana teslîm ettirilmek taleb ederim dedikde, gıbbe’s-suâl merkūm Ahmed cevâbında, müdde‘î-i merkūmu kelimât-ı meşrûhasının cümlesinde tasdîk edip, fi’l-vâki‘ menzil-i mezbûr müdde‘î-i merkūmun vech-i meşrûh üzre hakk-ı meşrûtiye deyû i‘tirâfından mâ‘adâ vakfiyye-i ma‘mûlün-bihâ ve ma‘mûlün-aleyhâsında dahi menzil-i mezbûrun süknâsı câmi‘-i mezbûrda imâm olanlara meşrût idiği mastûr ve musarrah olmağın, merkūm Ahmed’e menzil-i mezbûrdan hurûc ve mûmâ-ileyh es-Seyyid Emrullah Efendi’ye teslîme tenbîh-i şer‘î kılınıp, mâ hüve’l-vâki‘ gıbbe’t-taleb ketb olundu. Tahrîren fî evâhiri Cemâziyelâhir li sene seb‘a ve ışrîn ve elf. Şuhûdü’l-hâl: Fahrü’l-cüyûş Hüseyin Çavuş b. Mehmed, es-Seyyid Mehmed Efendi b. el-merhûm es-Seyyid Ahmed Efendi, İftihârü’l-emâsil Musa Çavuş, Zahrü’l-emâcid Osman Çavuş b. Dav[u]d Efendi, Derviş Çelebi b. Emrullah, Rıdvan Bey b. Abdullah, Osman b. Mustafa, Mehmed b. İlyas, Mehmed b. Cafer, Mustafa b. Abdullah er-râcil ve gayruhüm.