İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 329 Hüküm no: 475 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Mihal’in, Şeyhülislâm Kadızâde Efendi Evkâfı’na olan borcunun kalan kısmın taksitlendirildiği El-emru kemâ hurrire fîh harrerehû el-fakīr ileyhi subhânehû İbrahim b. Süleyman el-müvellâ-hilâfeten Bi Kostantıniyye el-mahmiyye. ufiye anhüm. Medîne-i İstanbul’da vâki‘ merhûm Şeyhülislâm Kadızâde Efendi Evkāfı’na bi’l-fi‘il mütevellî olan kıdvetü’l-allâm Mehmed Efendi b. İsmail tarafından husûs-ı âtîye vekîl olup, bi mâ hüve nehcü’s-sübût şer‘an vekâleti sâbite olan Ebûbekir b. Mahmud mahfil-i kazâda, işbu hâmilü’l-kitâb Luyizu v. Kiryazi nâm zimmî muvâcehesinde ikrâr ve takrîr-i kelâm edip, mâl-ı vakf-ı mezbûrdan Manol v. Mihal nâm zimmî zimmetinde on bin akçe olup meblağ-ı merkūme mersûm Luyizu emr ve kabûlü hâviye kefâlet ile kefîl olup, hâlâ müvekkil-i mûmâ-ileyh meblağ-ı merkūmdan üç bin akçesin asîl-i mezbûr mâlından ahz u kabz edip, bâkī yedi bin akçeyi üçer yüz akçe teslîm etmek üzre mersûm Luyizu üzerine taksîm edip, ol dahi taksît-i mezbûru kabûl eyleyip mukâssat olan meblağ yedi bin akçeden gayrı bir akçe ve bir habbe mezbûr Luyizu’da kalmadı dedikde, vekîl-i mezbûrun ikrâr-ı meşrûhun el-mukarru lehü’l-merkūm vicâhen tasdîk edip, bu hurûf ba‘de’t-taleb ketb ü tahrîr olunup, yedine def‘ olundu. Tahrîren fi’l-yevmi’s-sâbi‘ min Cemâziyelâhir li sene seb‘a ve ışrîn ve elf. Şuhûdü’l-hâl: Mehmed b. Ali, Süleyman b. Abdullah, Murad b. Mehmed, Osman b. Abdullah, Mustafa Çavuş b. Ali ve gayruhüm.