İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 330 Hüküm no: 477 Orijinal metin no: [54a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülgaffar b. Osman’ın ölen Hüseyin Ağa’daki alacağının terekesinden tahsil edilmesi Mahmiye-i İstanbul’da eş-Şeyh Ebülvefâ mahallesinde Abdülgaffar b. Osman nâm kimesne mahfil-i kazâda, bundan akdem mahmiye-i mezbûrede eş-Şeyh Ferhad mahallesinde sâkin iken vefât edip verâseti sulbiye kızı Asiye ve zevceleri Ayşe bt. Abdullah ile Yasemin bt. Abdullah’a munhasıra oldukda, kable’l-kısme mezbûre Asiye dahi fevt olup, sagīre ve sadriye kızı Ayşe bt. Ahmed ile merkūme Yasemin’e ve zevci mezbûr Ahmed b. İsa’ya munhasıra olmağın sagīre-i merkūmeye vasiyy-i muhtâr olup, muhallefâtına vâzı‘u’l-yed olan Kadri b. Mehmed mahzarında üzerine da‘vâ edip, bundan akdem mezbûr Hüseyin Ağa’ya on kıt‘a sahanı safka-i vâhide ile bin dört yüz otuz akçeye bey‘ ve teslîm edip, kabz-ı semen etmeden mezbûr Hüseyin Ağa vefât edip, terekesi veresesine müntakil oldukda, vasî muhallefâtına bi’l-vesâye vaz‘-ı yed etmeğin, deyn-i merkūmu mezbûr Hüseyin Ağa’nın muhallefâtından vasiyy-i mezbûrdan taleb ederin dedikde, gıbbe’s-suâl vasiyy-i mezkûr husûs-ı mezkûru münkir olıcak, gıbbe’l-istişhâd udûl-i Müslimînden el-Hâc Mehmed b. Mustafa ve Mahmud b. Osman nâm kimesneler mahfil-i kazâya li ecli’ş-şehâde hâzırân olup, fi’l-vâki‘ müdde‘î-i mezbûr müteveffâ-yı mezbûr Hüseyin Ağa’ya hâl-i sıhhatinde on bakır sahanı safka-i vâhide ile bin dört yüz otuz akçeye bizim huzûrumuzda bey‘ ve teslîm edip, ol dahi tesellüm etti, biz bu husûsa şâhidleriz, şehâdet dahi ederiz dediklerinde, gıbbe’t-ta‘dîl ve’t-tezkiye şehâdetleri makbûle olup, müdde‘î-i mezbûra meblağ-ı merkūmdan küllen ve ba‘zan müteveffâ-yı mezbûrdan almayıp ve vücûh-ı ibrâdan bir vechile zimmetini ibrâ ve ıskāt etmediğine yemîn billâhi te‘âlâ etmeğin, mûcebi ile hükm birle, bu hurûf ketb u tahrîr olunup, tâlibi yedine def‘ olundu. Tahrîren fi’l-yevmi’s-sâmin aşer min Cemâziyelâhir li sene seb‘a ve ışrîn ve elf. Şuhûdü’l-hâl: Mehmed b. Üveys er-râcil, Yusuf b. Mehmed, Ebûbekir b. Osman, el-Hâc Mehmed b. İsmail ve gayruhüm.