İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 331 Hüküm no: 479 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kubad b. Salim’in kızı Reşide’yi Ali b. İsa’nın oğlu Bedevi ile evlendirdiği Evlâd-ı Arab’dan olup Benî Hamâs cemâ‘atinden Kubad b. Salim nâm kimesne meclis-i şer‘-i kavîm-i lâzımü’t-tekrîmde, yine cemâ‘at-i mezbûreden hâfızu’l-kitâb Ali b. İsa nâm kimesne mahzarında ikrâr ve takrîr-i kelâm edip, sulbiye kızım Reşide nâm sagīreyi velâyetim hasebiyle mezbûr Ali’nin oğlu Bedevi nâm sagīre iki bin akçe mehr-i mu‘accel-i makbûz ve iki yüz akçe mehr-i müeccel ile tezvîc eyledim, merkūm Ali dahi velâyeti hasebiyle kızım mezbûre Reşide’yi oğlu merkūm Bedevi’ye tezevvüc eyledi dedikde, mukırr-ı mezbûrun vech-i meşrûh üzre ikrârın merkūm Ali bi’l-muvâcehe tasdîk ve kendi dahi vech-i merkūm üzre velâyeti hasebiyle oğlu mezbûr Bedevi’ye sagīre-i mezbûreyi, zikirleri sâlif mehr-i mu‘accel ve müeccel ile tezvîci kabûl eylediğini tahkīk edicek, mâ hüve’l-vâki‘ gıbbe’t-taleb ketb ve terkīm olundu. Tahrîren fî gurre-i Recebi’l-ferd min şuhûri sene seb‘a ve ışrîn ve elf. Şuhûdü’l-hâl: Mustafa b. Emir, Selim b. Fevzi, Cuma b. Ali, Ali b. Mansur, Ahmed b. Mehmed, Raşid b. Sefer ve gayruhüm.