İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 338 Hüküm no: 488 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kıptilerin İstanbul mahallelerinde dolaşarak kalay yapamayacakları Mahmiye-i İstanbul’da olan kalaycı tâ’ifesinin kethüdâsı İbrahim b. Hızır ve yiğitbaşısı Abdi b. Hüseyin ve ihtiyâr üstâdlardan Ali b. Osman ve el-Hâc Receb b. Kaya ve Hasan b. Mehmed ve Halil b. Mustafa ve Hüseyin b. Oruç ve Ali b. Abdullah ve sâirleri meclis-i şer‘-i şerîfde, kıbtî tâ’ifesinden Solak b. Ramazan ve Timur b. Arab ve Şaban b. Abdullah mahzarlarında takrîr-i kelâm edip, kadîmü’l-eyyâmda mahmiye-i mezbûrede olan kalaycılar dükkânda oturup kalaya muhtâc olan eşyâyı ashâbı getirip dükkânlarda kalayladır idi. Hâlâ merkūmûn kıbtîler olagelene muhâlif dükkâna geçmeyip, mahallât arasında gezip kalaya muhtâc olan eşyâyı mahallelerde kalaylayıp, bizim kâr u kisbimize mâni‘ olduklarından gayrı, biz ehl-i dükkân değiliz deyû vâki‘ olan tekâlîfi bizimle edâ etmekden imtinâ‘ ettikleri ecilden men‘ olunup, sâir üstâdlar gibi dükkânda iclâs olunmaları için elimizde emr-i şerîf vardır deyû ibrâz edip, nazar olundukda, mazmûn-ı sa‘âdet-makrûnu takrîrlerine muvâfık bulunmağın, mezkûrûn kıbtîler istintâk olunduklarında, biz İstanbul’da ancak üç ay mütemekkin oluruz, dükkânda oturamazız ve vâki‘ olan tekâlîfi dahi edâ edemeziz dediklerinde, tâ’ife-i mezbûrenin yedlerinde olan emr-i cihân-mutâ‘ mûcebince mersûmûn kıbtîlere kalaycılık ederseniz sizde sâir üstâdlar gibi dükkânda işleyin deyû tenbîh olunup, mâ hüve’l-vâki‘ gıbbe’t-taleb ketb olundu. Hurrire fi’l-yevmi’t-tâsi‘ ve’l-ışrîn min Cemâziyelâhir li sene seb‘a ve ışrîn ve elf. Şuhûdü’l-hâl: El-Hâc Ali b. Abdullah, Mehmed b. Timur, Mahmud b. Hızır, Murad b. Mehmed ve gayruhüm.