İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 338 Hüküm no: 489 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yani’nin Dimitri v. İstadi’deki alacağının ödenmesi Mahmiye-i İstanbul’da İstati v. Yani nâm zimmî meclis-i şer‘-i şerîf-i lâzımü’t-teşrîfde, işbu hâfızu’l-kitâb Dimitri v. İstadi nâm zimmî üzerine da‘vâ edip, bundan akdem mezbûr Dimitri’ye üç yüz yirmi beş akçe verip, mukābelesinde merkūm Dimitri bana bir çuka ferâce rehin vaz‘ eylemiş idi. Meblağ-ı merkūmu mezbûr Dimitri’den taleb ederim dedikde, gıbbe’s-suâl mersûm Dimitri cevâbında, zikr olunan üç yüz yirmi beş akçeyi mezbûr İstati’ye def‘ ve teslîm eyledim demeğin, ba‘de’l-inkâr, mezbûr Dimitri’nin sıdk-ı makāline beyyine taleb olundukda, ityân-ı beyyineden ızhâr-ı acz edip istihlâf etmeğin, zikr olunan üç yüz yirmi beş akçeyi merkūm Dimitri yedinden ahz u kabz eylemediğine yemîn billâhi te‘âlâ etmeğin, meblağ-ı mezbûrun edâsına tenbîh olunup, mâ vaka‘a bi’t-taleb ketb olundu. Tahrîren fi’s-sâmin ve’l-ışrîn min Cemâziyelâhir li sene seb‘a ve ışrîn ve elf. Şuhûdü’l-hâl: Sinan b. Abdullah, Bekir b. Osman, Süleyman b. Abdullah, Mustafa b. Mehmed, Musa b. Veli, Hamza b. Mustafa.