İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 340 Hüküm no: 492 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dolapçı Hacı Hüseyin b. Veli’nin kölesi Hasan’ın hür bir kadının oğlu olduğundan serbest bırakılması İşbu orta boylu açık kaşlı kara gözlü Hasan nâm kimesne mahfil-i kazâda kendüye mâlikiyyet zu‘muyla vâzı‘u’l-yed olup, mahmiye-i İstanbul’da Sarâ-yı Atîk’de dolabçı el-Hâc Süleyman b. Veli mahzarında üzerine takrîr-i da‘vâ edip, bundan mukaddem vilâyet-i Anadolu[’da] Kangırı kazâsına tâbi‘ Bayındır nâm karyeden Fâtıma bt. Cafer nâm hurretü’l-aslın firâşından tevellüd edip, sadrî oğlu olup, kat‘â rık kârı olmamış iken mezbûr el-Hâc Süleyman bana bi gayri vech-i şer‘î vaz‘-ı yed eyledi. İbtâl olunup benden yed-i âdiyesi def‘ u ref‘ olunmak taleb ederim dedikde, gıbbe’s-suâl mezbûr el-Hâc Süleyman cevâbında, müdde‘î-i mezbûr Hasan’ı rık olunmak üzre iştirâ ettiğimde, rıkkına mu‘terif olmuş idi, vaz‘-ı yedim ona binâendir, mezbûrun vech-i meşrûh üzre hurrü’l-asl idiği ma‘lûmum değildir dedikde, gıbbe’l-istintâk, mesfûr Hasan sâbıkan rıkka ikrârına mukırr olduğu ecilden, mücerred kavliyle halâsa mahâl olmayıp istişhâd olundukda, udûlden Mustafa b. el-Hâc Pir Aziz ve Ahmed b. Hamza nâm kimesneler li ecli’ş-şehâde meclis-i şer‘a hâzırân olup, gıbbe’l-istişhâd, her biri edâ-i şehâdet-i şer‘iyye edip, fi’l-vâki‘ karye-i mezbûreden Fâtıma nâm hurretü’l-aslın sadrî oğludur, firâşından tevellüd etmeğin hürdür, bu husûsa şâhidleriz, şehâdet dahi ederiz dediklerinde, ba‘de’t-ta‘dîl şehâdetleri makbûle olmağın, ba‘de’l-hükm kayd şüd. Hurrire fi’t-târihi’l-mezbûr. Şuhûdü’l-hâl: Hasan Sofu b. el-Hâc Ali, Mehmed b. el-Hâc Hızır, Ahmed b. Hamza, Murad b. Abdullah.