İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 343 Hüküm no: 498 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mevlânâ Kemaleddin Efendi b. Hacı Zülfikar’ın Kargı’nın Emiri köyündeki bağını Mustafa b. Mehmed’e sattığı Fahrü’l-kuzât Mevlânâ Kemaleddin Efendi b. el-Hâc Zülfikar meclis-i şer‘-i şerîfde, vilâyet-i Anadolu’da Kargı kazâsına tâbi‘ Emîrî nâm karye sâkinlerinden Mustafa b. Mehmed nâm kimesne tarafından ikrâr-ı âtîyi tasdîka vekîl olup, fahrü’l-kuzât Mevlânâ İnâyetullah Efendi b. Musa ve İbrahim b. İsmail nâm râcil şehâdetleriyle vekâleti hasm-ı şer‘î-i mu‘teber mahzarında sâbite olan fahr-ı kuzâtü’l-İslâm Mevlânâ Mehmed Sadi b. Mustafa muvâcehesinde ikrâr-ı tâm ve ta‘bîr ani’l-merâm edip, medîne-i mezbûre sınırı dâhilinde vâki‘, bir tarafı İbrahim b. el-Hâc Mustafa bağıyla ve bir tarafı Hasan b. Durmuş bağıyla ve bir tarafı Veli b. ( ) bağıyla ve bir tarafı tarîk-i hâs ile mahdûd ve mümtâz olan bir kıt‘a mülk bağımı cemî‘-i tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Mustafa’ya râyic fi’l-vakt ve’l-hîn üç bin akçeye bey‘ edip, kabz-ı semen eyledim, ol dahi vech-i muharrer üzre iştirâ ve kabûl ettikden sonra bey‘-i mezbûru mahallinde kabza müşterî-i merkūm Mustafa’yı taslît eyledim dedikde, mukırr-ı mûmâ-ileyhin ikrâr-ı meşrûhunu vekîl-i merkūm bi’l-vekâle vicâhen tasdîk edicek, mâ vaka‘a bi’t-taleb ketb olundu. Tahrîren fi’l-yevmi’l-isneyn min şehri Receb li sene seb‘a ve ışrîn ve elf. Şuhûdü’l-hâl: Fahrü’l-kuzât İnâyetullah Efendi b. Musa, Nasûh Çavuş Kethüdâ, Said Çavuş b. Mustafa, İbrahim b. Ali er-râcil, Abdullah b. ( ) ve gayruhüm.