İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 348 Hüküm no: 507 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine b. Mehmed ile boşandığı eşi Murad b. Mehmed’in mehir ve eşya davasında sulh oldukları Mahrûse-i Kostantıniyye’de Beyceğiz mahallesinde sâkin Emine Hâtun bt. Mehmed mahfil-i kazâda, zevc-i mutalliki hâmilü’l-kitâb Murad b. Mehmed nâm muhzır mahzarında ikrâr ve takrîr-i kelâm edip, mezbûr Murad zevcim olup beni tatlîk eylediğinde, mezbûrdan dört bin beş yüz akçe mehr-i müeccelimi ve nafaka-i iddetimi da‘vâ ve taleb edip, mezbûr Murad dahi benden on ayaklı sahan ve bir kaliçe ve bir kilim ve Yanbolu kebesi ve bir çift sepet sandığı ve on vakıyye keten taleb ve da‘vâ etmeğle, beynimizde münâza‘ât-ı kesîre ve muhâsamât-ı şedîde ve hatîre vâkı‘a olmuşidi. El-hâletü hâzihî beynimizde muslihûn tavassut edip, mezbûr Murad eşyâ-i mezkûre da‘vâsından ve ben de zikri sâlif mehr-i müeccel ve nafaka-i iddet da‘vâsından ferâğ etmek üzre bizi sulh eylediklerinde, ben dahi sulh-ı mezbûru kabûl edip, zikr olunan mehr-i mu‘accel da‘vâsından ve sâir de‘âvî-i husûmâtdan mezbûr Murad’ın zimmetin ibrâ-i âmm-ı kâtı‘u’n-nizâ‘ ibrâ ve terk-i da‘vâ etdim. Min ba‘d tarafeynden hilâf-ı zâlik bi’z-zât veya bi’l-vesâta da‘vâ sudûr ederse, lede’l-hükkâmi’l-kirâm mesmû‘a ve makbûle olmaya dedikde, mezbûre Emine’yi ikrâr-ı meşrûhunda mezbûr Murad dahi vicâhen ve şifâhen tasdîk ve zevce-i merkūm üzerine kendüden eşyâ-i merkūme da‘vâsından mezbûre Emine’nin zimmetin cemî‘-i de‘âvî ve husûmâtdan ibrâ ve terk-i da‘vâ eylediğin i‘tirâf ve tahkīk etmeğin, mâ vaka‘a bi’t-taleb ketb ü tahrîr olundu. Tahrîren fî 8 min Recebi’l-müfred li sene seb‘a ve ışrîn ve elf. Şuhûdü’l-hâl: Mehmed b. Ahmed, Mahmud b. Bâli, el-Hâc Mehmed b. İsmail, Veli b. Osman, Süleyman b. Ahmed, Ebûbekir b. Osman, Ahmed b. Şahbaz, İbrahim b. Receb ve gayruhüm.